Pyes teat i fer rapel menas piratri |29 November 2014

Festival Kreol i lokazyon kot nou afirm nou lidantite atraver selebrasyon nou kiltir Kreol. I anmenmtan ofer nou lokazyon pour promot e prezerv nou kiltir e montre nou lapartenans a kominote kreolofonn enternasyonal atraver diferan aktivite.

Meter ansenn Angelin Marie li, ti deside servi Festival Kreol sa lannen konman en moman pour fer nou rapel en fleo ki’n en kosmar pour nou pei e popilasyon pandan sa bann dernyen lannen. Sa se piratri dan Losean Endyen ki ankor reste en menas lo lavi nou bann maren, lo nou lendistri lapes ek tourizm, lo komers maritim e lo lekonomi nou pei an zeneral.


Atraver pyes teat ‘Bonn Aniverser Kaptenn’, Angelin i kontribye pour nou pa bliy risk ki nou bann maren i ladan letan zot lo lanmer. Pour bann ki ganny atrape avek pirat, i fer nou santi soufrans zot fanmiy deryer e langwas en pep antye pandan ki lotorite pe fer demars pour ganny zot liberasyon.

‘Bonn Aniverser Kaptenn’ i rakont zistwar Kaptenn Thomas – rol enterprete par Didier Belle – ek son lekipaz de peser (Paolo Bonn ek Johnny Magnan). Letan zot pe retourn Mahé sorti lapes, zot ganny atrape par en group pirat zwe par Jeris Dogley, Richie Flore ek zot sef Sylvester Samson. Zot ganny forse pour sanz trazektwar zot bato, ‘La belle Julianna’ e fer larout Somali. Zot ariv laba zour ki zot ti sipoze ariv Mahé e ki osi zour laniverser Kaptenn Thomas.

Olye ganny akei par son fanmiy ki ti’n organiz en parti sirpriz pour li avan ki i pran en long konze e al en vakans an fanmiy Lespanny, sa kaptenn ek son lekipaz i retrouv zot fas a en sef pirat vyolan ki kontan son fizi e pa zanmen ezite pour fer li pete. Menm si zot ti ganny atrape dan delo teritoryal Sesel, sef pirat i akiz zot pour vin vol pwason Somali, andotmo eksplwat zot resours alors ki bann Somalyen zot «pa ganny ni en pti pwason pour fri».

Sef pirat i telefonn Sesel e demann gouvernman ek proprieter ‘La belle Julianna’ en ranson 1.5 milyon dolar. Si non, i’n menase pour touy son bann otaz.
Deryer isi Mahé, bann madanm sa trwa peser (Jemma Moka, Stephanie Joubert, May Ruth Fanny) i enkyet e zanfan (Hamelie Estro ek Hakeem Auguste) pe demande kan zot papa pou retournen.

En vwazen (Lena Hertel) i zwenn avek zot dan zot lapriyer : «Fer sir toulezour ou rod Bondye,» i dir. Kanmenm, zot moral pa tonbe e sa pa anpes zot pour pandan en rar moman detant, fer en refleksyon lo nou bann pratik e valer tradisyonnel ki pe degrade.

Lapriyer ek sa bann bon valer in petet kontribye pour fer Bondye entersed pour nou bann maren. Erezman, sa zistwar pirat i finalman fini byen parey tou bann vre latak pirat ki nou’n konnen ziska prezan. Apre negosiasyon, le trwa otaz i finalman ganny large e en emiser (Henry Woodcock) i al sers zot pour reini zot avek zot fanmiy.

Me dan en melanz lakontantman ek lemosyon eksprimen par larm lazwa, zot paret oubliye pour dir « bonn aniverser Kaptenn » !
Bann portre ki akonpanny lartik i montre enn de senn dan pyes teat ‘Bonn Aniverser Kaptenn’.

M. S.