Bidze 2015; 3.94 bilyon roupi pou ganny envesti dan proze sosyal an 2015-18 |17 December 2014
Plizyer proze lakaz, lekol, fasilite pour peser, semen, sistenm drenaz ek lezot lenfrastriktir i ekspekte demare apartir lannen prosenn, Minis Pierre Laporte in anonse dan diskour bidze Lendi dan Lasanble Nasyonal.
Minis pour Finans, Komers ek Lenvestisman ti dir ki gouvernman in prozekte pour depans 3.94 bilyon roupi dan son plan lenvestisman dan bann proze sosyal dan bann distrik pour peryod 2015 -2018.
Dan sa sonm, 1.2 bilyon roupi pou ganny depanse an 2015. Pli gro porsyon—329 milyon roupi -- pou al pour sekter lozman ek sekter devlopman kominoter.
“Sa i reflekte langazman gouvernman pour kontinyen fourni lozman afordab e servis kominoter pour nou pep,” Minis Laporte ti fer resorti.
Bann proze lakaz i enkli: 50 milyon roupi pour proze Ex-Desaubin Takamaka; 78 milyon roupi pour proze lakaz ek devlopman lenfrastiktir lo Ile Perseverance ; 37 milyon roupi pour trwazyenm faz Corgat Estate; 9.0 milyon roupi pour demar konstriksyon 36 flat lo sit ex- lekol Dominic Savio Mont-Buxton; e 32 milyon roupi pour lezot proze lakaz dan lezot distrik.
Pour devlopman proze kominoter, sa i enkli: 30 milyon roupi pour bann pti proze distrik; 4.9 milyon pour day care centres dan distrik Anse Etoile, Anse Aux Pins, Sans Soucis, e Grand Anse Praslin; e 2.5 milyon roupi pour semen segonder Montagne Posée.
Minis Laporte ti eksplike ki an 2015 pou osi annan 2 nouvo proze dan sekter ledikasyon, notaman re-konstriksyon lekol La Rosière ek sant pour formasyon lagrikiltir ek ortikiltir (SAHTC) Anse à la Mouche, ki pou ganny finanse par Fon Kuwait ek gouvernman Sesel. Sa de lekol pou kout 78 milyon roupi e 62 milyon roupi respektivman.
Minis laporte ti dir ki gouvernman in met 18 milyon roupi pour sa dan bidze 2015.
Redevlopman lekol primer Cascade pou osi kontinyen lannen prosenn e pour sa 9 milyon roupi in prevwar dan bidze. Sa lekol pou ganny finanse antyerman par gouvernman Sesel.
“Lekol primer Glacis, en lot proze kle dan sekter ledikasyon e ki pe ganny finanse par gouvernman Lasin, i ekspekte konplete an 2015,” Minis Laporte ti anonse.
Antretan 2 proze enportan dan sekter Lasante in konplete sa lannen. Sa i nouvo younit pour dyaliz e renovasyon lasal loperasyon kot Lopital Sesel. Sa 2 proze in kout gouvernman 35 milyon roupi ek 12 milyon roupi respektivman.
“An 2015 nou pou amelyor ankor nou bann fasilite servis lasante avek 18 milyon roupi ki pou depanse dan renovasyon e amelyorasyon lezot fasilite kot Lopital Sesel, e 8 milyon roupi pour bann sant lasante kominoter, enkli amelyorasyon klinik Rivière Anglaise e amelyorasyon Lopital North East Point,” minis ti eksplike.
Gouvernman pe osi ogmant son zefor pour amelyor bann lenfrastriktir semen.
“Nou sistenm transpor pou benefisye avek en logmantasyon dan alokasyon bidzeter an 2015, avek en total 68 milyon dan bidze lenvestisman e 22 milyon dan bidze operasyonnel,” Minis Laporte ti dir.
Bann proze dan bidze operasyonnel i enkli:
• Konstriksyon nouvo semen dan bann distrik (27 milyon roupi)
• Maintenance bann semen e materyo koltar (11 milyon roupi)
• Akizisyon lekipman avek masin (8.6 milyon roupi)
• Victoria Traffic Management Plan (8.0 milyon roupi)
• Amelyorasyon e lagrandisman semen segonder (7.8 milyon roupi)
• Lezot lenfrastriktir tel parey crash barriers ek bus shelters (3.6 milyon roupi).
En sonm adisyonnel 20 million roupi pou ganny depanse lo travay lenfrastriktir tel parey bann landrwa kot delo i desarze pandan gro lapli, debousman larivyer, travay pour retir labou, e travay drenaz, enkli dan distrik Pointe Larue e lo La Digue.
An sipor bann peser artisanal, plan pour fasilite de baz pour preski tou distrik lapes in fini ganny prepare e bann ki’n fini ganny fer i enkli Roche Caiman ek Anse Aux Pins. Konstriksyon bann fasilite parey pou kontinyen Glacis, Beau Vallon, Bel Ombre, Anse Royale, Cascade, Anse Boileau ek Praslin.
Dan sekter elektrisite ek delo, gouvernman pou an 2015 siny 2 nouvo lòn. Premye en lòn 21 milyon Dolar Ameriken pour ogmant kapasite danm La Gogue e amelyor sistenm delo potab dan nor Mahé.
Dezyenm i en lòn 35 milyon Dolar Ameriken pour finans laliny elektrisite 33Kv pour Sid Mahé.
Osi an 2015, PUC pou benefisye avek ankor 7 milyon Ero sorti kot Labank Envestisman Eropeen e l’Agence Francaise de Developpement pour proze delo ek sanitasyon.