Movetan i fer dega |05 January 2015
Letan ti amelyor en pti pe yer menm si i ti reste sonm avek lapli -- ki pa ti osi entans parey bann zour oparavan -- ki ti tonbe tanzantan lo serten landrwa.
Lapli ki’n tonbe depi plizyer zour me ki ti entansifye le 2 ek le 3 Zanvye in okazyonn dega sirtou dan rezyon santral Mahé. Parmi bann dega ti lateras ek miray grennen, pye dibwa tonbe, delo ki’n inond bann lakaz, delo monte sirtou dan rezyon Mont Fleuri.
Plis dega ti dan rezyon Forêt Noire kot laba ti annan trwa lensidan lateras grennen e osi en miray par anba en lakaz ki ti’n degrengole.
Sanmdi bomaten bann zofisye distrik osi byen ki bann zofisye servis dirzans ti lo teren pour evalye sitiasyon dan sa bann landrwa e osi pour asir sekirite bann fanmir e konsey zot.
Zofisye relasyon piblik kot Lazans Servis Tenny Dife ek Sovtaz, Msye Jones Madeleine, ti dir ki bann zofisye sa lazans ti lo teren depi byen granmaten apre ki zot ti’n ganny plizyer lapel pour led.
I ti azoute ki ti annan bann ka ki zot tousel zot pa’n kapab fer nanryen akoz groser lateras ki ti’n degrengole ti nesesit lasistans lezot lazans parey Divizyon Zesyon Risk ek Dezas (DRDM) ek Departman Lanvironnman.
Menm si a sa moman Msye Madeleine ti dir ki zot ti’n rikord senk ka lapel pour led, i ti fer remarke ki i kapab annan lezot ka ki lezot lazans in rikorde me i ti kantmenm ankouraz dimoun pour enform bann lazans konsernen lo okenn danze potansyel kot zot lakour dan en fason ki zot a kapab ganny konseye lo sa bann risk e mezir prekosyon ki kapab ganny pran a sa moman me non pa zis kit zot lakaz.
“I enportan ki si nou kit nou lakour nou kit li an sekirite e ler nou retournen i ankor an sekirite akoz i pa fer sans si zis nou kit nou lakour kot i annan danze san rod konsey avek lasistans e apre nou vwar nou perdi tou keksoz. I enportan alor ki dimoun i rod led ek konsey avek bann lazans konsernen,” Msye Madeleine ti eksplike.
Antretan en alert nivo 3 ki DRDM ti’n deklanse pandan letan movetan ti ganny mentenir ziska 7er yer bomaten. En alert sa nivo i vedir ki sitiasyon i ase grav.
Direkter DRDM, Msye Paul Labaleine, ti dir Sanmdi swar ki bann zofisye sa lazans ti lo teren depi 3.20 bomaten pour evalye sitiasyon apre bann lapel pour lasistans ki zot ti’n resevwar sirtou sa ka miray degrengole Forêt Noire.
Msye Labaleine ti fer remarke ki DRDM ti’n mobiliz son bann zofisye e zot ti lo alert pour okenn evantyalite. Menm si lapli ti vin sitan vit Sanmdi, sa bann zofisye ti fer zot mye pour asiste piblik me i annan serten keksoz ki zot bezwen esper lapli pase pour kapab kontinyen fer zot travay.
