Mon Sezour |24 January 2015

Laresers pour mwan grandi spirityelman

Atraver bann sirkonstans ek kondisyon mon lavi

I ed mwan pour sanze e evolye

Mon lavi se mon vwayaz spirityel

Kot mon karakter i devlope e grandi an profonder

Afen ki mon resanble deplizanpli mon lorizin divin

Koman en zanfan Bondye mon defi se fer zefor

Pour merit leritaz son karakteristik dan mon karakter

E transform mon personalite pour resevwar plis lalimyer

E pourtan mon viv dan en lemonn difisil

Kot lebyen ek lemal i kotway kanmarad toulezour

Avek bokou lenfliyans e konpleksite lakonfizyon

Sa ki bon ek sa ki move i viv ansanm

A lenteryer mon konsyans e se en batay konstan

Pour konn la diferans e reste angaze pour le meyer

En swa dan mon lentere osi byen ki dan lentere lezot

Larmoni i nesesit en balans parfwa difisil e troublan

Ant mon prop bezwen e dezir mon volonte e fason vwar

Avek sa ki pour mon frer ek ser lo menm parkour lavi

Mon oule servi lezot pour soulaz fardo kotidyen

E anmenmtan reste onnet e transparan dan mon misyon

Pour kapab rann kont avek le Senyer mon Bondye Kreater

Menm si parfwa i arive ki mon fel dan mon lesey

Atraver febles personnel tantasyon ek mankman

Mon reste touzour konsyan ki mon bezwen lo mon gard toultan

E vey byen mon ban enpilsyon ki parfwa pa atenn bi pli o

O fil bann lannen ki pase sanzman kontinyel a tou nivo

I obliz mwan mars dan direksyon pour grandi e vin pli matir

Pour kontinyen aprann e reste touzour motive

Par en lanmour e en konpasyon fraternel

Mon ganny touse par lalimyer lezot e an retour

Mon prop lalimyer i repann otour mwan pour eklere e dirize

Fri ki mon rekolte se sanmenm legren ki mon’n senmen

Par mon bann desizyon, lobligasyon ou omisyon

Sak zour depi soley leve ziska soley kouse

Mon tras larout trankilman ver sa desten

Pour kit sa Later pour al dan Lodela

Pasaze isi ba dan sa vwayaz kourt me byen ranpli

Mon rekonnet mon lasours dan lemonn divin e envizib

Pour vin lekol lo sa Later plannet spesyal

E kan tou in fini pour retourn ver mon lorizin

E konplet mon sezour laprantisaz pour mon lam dan sa lavi

Antretan les mwan bennyen dan linosans mon lanfans

An mezir ki mon seve i obeir sanzman letan e blansi

Les mwan ekout zwazo pe priye lo ler matinal

Zot louanz sa nouvo zour dan la Kreasyon

Avan ki soley i pers lorizon dan grouyman lavi

Les mwan ganny berse par sa trankilite e lape

Dan repo dous sa lannwit ki bes son rido

Mon regard montanny Trwa Frer solid, fyer e silansye

Konman en temwen lwayal lavi dan son diversite

Nou ne, grandi, vyei e pase pour al lot kote

Pandan ki lalin ek zetwal i sant kantik

Pour selebre la rekreasyon sa vas liniver misterye

E letan i koule konman en larivyer enfini ver losean

Ki anbras li pour fer sa maryaz lavi ek lanmor

Lannwit i sivre lizour e lizour i sivre lannwit

Dan sa ladans a de pa ver leternite

Ziska ki tou pou zwenn ansanm

Kan laser pou vin lapousyer

Pour liber lam ki anfen pour pran lavol

Dan en lalimyer lanmour e lape seles

Kan lafen isi pour vin konmansman laba

E tou i rekonmanse e tou i rekontinyen


Alor mon lev mon lam an gratitid pour loner

Mon sezour lo sa later

Robert Ahweng