Evit move lenfliyans pour ou kapab vin pli rezilyan |24 January 2015

Alors en zour trwa zenn garson aze 14-an – Joe, Billy ek Tony -- ti zwenn deryer en laklas pandan rekreasyon kot zot lekol segonder.  Zot ti abitye fer sa pour pran zot goute e partaz lenformasyon konsernan lanmizik, sports ek lezot lentere ki zot ti annan.

Sa bomaten la, Tony ek Billy ti remarke ki Joe ti’n tir en nespes zafer dan laform en gro sigaret dan son pos, e kasyet li dan son lanmen.  Tony ek Billy ti demann li:

“Joe, kisisa sa?  

Joe ti reponn zot: “Relax bann la – sa mon dil sa – mon pe al servi li”.  

I ti alim sa gro sigaret an kasyet e komans fimen. Tony ek Billy ti konmans touse ler en lafimen avek en loder for ti pas anba zot nennen. Joe li i ferm son lizye e pran ankor en gro bos lo son sigaret e i dir: “Frer, sa i “Ire”, sa I “Cool”!  I fer mwan “chill out”!  Zot oule eseye?”

Son de zanmi ti reponn li “Ou fou – oule fer nou manmi touy nou, si zot konnen nou pe fimen?”

Joe ti dir:  “Serye zot bann la.  Sa i zis enn ti tyalas ek en pe lapoud melanze. I donn ou “steam” e i ed ou pour tir ou problenm?”

Billy i sot anler!  “Mon frer – ou pa konnen ki ou pe dir!  Depi kan drog ti ede pour tir problenm?  O kontrer sa pou gat ou lavi e detri ou.  Kote ou aprann sa kalite mansonz?  Tou sa ledikasyon ki annan pour fer nou zenn konnen kisisa drog, ou pa ankor konpran?”

Joe ti reponn” “Mwan mon ti kwar zot de bon zanmi – saler zot de kapon!  Zot per pour zot konn lavi.  Zot manman in met zot anba zot zip!  Haha!  Get zot, sanmenm sa zonm sa?”

Tony i poz son de lanmen lo zepol Joe e i sekwe li for:  “Wake up man!”  Kote ou kwar semen drog pou anmenn ou?  Ver en bon lavenir?  Bliye sa!  Si ou pa arete ou ava gete ou menm!  Nou nou oule en bon ledikasyon e en bon lavenir.”

Kestyon pour refleksyon?

• Ki ou kwar pour arive avek Joe?

• Si ou ti dan plas Billy ek Tony eski ou ti pou kontinyen frekant Joe?

(a)    Si wi – akoz?

(b)    Si non – akoz?

• Ki ou kapab fer pour ed en zanmi ki pe konmans pran semen drog?

Leson Moral

• Swa ki nou fer ozordi i annan en lenpak lo nou lavenir – ki kalite lavenir eski nou anvi pour nou konnen ki mannyer nou bezwen viv ozordi?

• Annou pa zanmen oubliye ki kalite legren ki nou senmen se sanmen sa kalite fri ki nou pou rekolte.  Ki kalite legren eski nou pe senmen toulezour?

• Si nou anvi ganny meyer fri nou bezwen konmans senm meyer legren depi ozordi menm.

Kontribye par:  
Robert Ahweng
Care House