Pon Ile Soleil pou konstri byento |27 January 2015

Travay lo pon ki pou lye Ile Soleil – sa zil artifisyel ki’n konble lo lakot Anse aux Pins – avek Mahé pou konmanse ver lafen sa mwan e i pou pran apepre enn an pour konplete.

Sa pon pou konnekte avek Ile Soleil zis par devan sa pti batiman avan bazar Anse aux Pins ki avan ti en twalet e ki bann peser pe an se moman servi konman en stor. Sa i trouve apepre vizavi stasyon Cable and Wireless. I pa ankor deside sepandan si pou met en ronpwen oubyen en senp krwaze kot sa de semen pou zwenn.

Se lakonpannyen responsab pour devlopman lo sa zil, 2020 Development (Seychelles) Ltd, ki ti fer sa lanons pandan en miting avek bann peser e propriyeter bato Anse aux Pins Sanmdi bomaten. Sa lakonpannyen in osi anonse ki i pou fouy e agrandi  kannal ek lapas ki sa  bann peser ek lezot bato i servi pour antre deryer bazar sa distrik.

Pandan ki travay pe fer, bann propriyeter in ganny demande pour mouy zot bato dan morso sid avek bazar ki vir avek Au Cap.

Bann peser ek propriyeter bato in sepandan fer resorti serten konsern vizavi sa bann devlopman. Parmi, zot dir ki landrwa mouyaz i riske pa sifizan pour sa kominote anviron 50 peser.

Zot azoute ki menm si kannal ek lapas i fouye pour vin pli gran, zot pou reranpli avek disab apre de trwa mwan.
Bann peser i dir ki i osi neseser pour agrandi lapas Au Cap ki zot servi pandan vannswet, kan i enposib pour pas par lapas Anse aux Pins.

Zot in osi konplent ki si zot mouy zot bato lwen avek zot stor, sa i fer li difisil pour zot transport zot bann lekipman parey masin ek tenk bennzin, e osi pwason ler zot sorti lapes.

Zot pe osi reklanmen ki zot ganny bann fasilite apropriye parey stor ek twalet ki zot ti ganny promet letan proze Ile Soleil ti konsevwar.

Msye Clifford Toussaint, en reprezantan SFA (Lotorite Lapes Seychelles) ki ti prezan, in fer resorti ki idealman peser Anse aux Pins i devret benefisye avek sa bann fasilite parey i egziste Anse Etoile, akondisyon ki zot konstriksyon pa koz en lefe advers pour lanvironnman.

I ti eksplike ki SFA i parfwa ganny difikilte pour aste later pour fer sa bann devlopman.
Lo son kote, Ladministrater Distrik Anse aux Pins, Sybilla Mathiot, in azoute ki lotorite pa pe konsider agrandi bazar an se moman vi ki sa fasilite in fek repare. In dir ki i plito annan propozisyon pour ofer plis landrwa otour pour bann vander. Dapre li, i osi annan posibilite pour konstrir ponton kot bann bato a kapab koste alavenir.

In antretan lans en lapel avek bann peser ek lezot dimoun ki servi sa landrwa pour pran zot responsabilite e gard li prop e dan en bon leta.

Lezot danze ki konsern bann peser Anse aux Pins e ki zot dir lotorite i devret adrese, i bann pike ki kontrakter in met dan delo e ki parfwa zot pa war, gro bato ki pas tro pre avek lakot e bann zenn ki fer sport lo ‘jet ski’ e dan ‘speed boat’.

Pandan ki trayay, ki pou antreprann par lakonpannyen UCPS, pe deroule piblik pe ganny demande pour respekte direktiv pour anpes retar e sirtou asir sekirite dan sa landrwa.

En kestyon ki manm piblik pe sepandan demande se vi ki i deza annan konzesyon trafik Anse aux Pins sirtou dan bomaten, akoz 2020 Development (Seychelles) pa’n anmenmtan konsider fer en lot konneksyon avek Ile Soleil aparti Anse Faure ?