Dife i bril en lakaz konpletman Machabée |31 January 2015

Dife ti konpletman detri e met en lakaz kat lasanm aplat ater yer bomaten Machabée.
Sa ti en lakaz an bwa avek tol.

Met lakaz, France Guichard ki ti pe travay lo por ler sa lensidan ti arive, ti dir ki li, son madanm, son fiy 6-an ek son de frer zot in perdi tou zot keksoz.

“Napa nanryen ki reste,” i ti dir.

Dapre zofisye relasyon piblik kot lazans servis tenny dife ek sovtaz, Jones Madeleine, zot ti ganny alerte lo sa lensidan par en vwazen ver 9.45 bomaten.  
De gro masin tenny dife, enn pli pti ek trez zonm ti ganny deplwaye. Ti pran zot anviron 12 minit pour arive apre ki zot ti’n kit konzesyon trafik anvil,. Ler zot ti arive lakaz ti’n fini bril net.

Msye Madeleine ti dir i paret ki sa dife ti ganny vwar tro tar e vi ki sa lakaz ti an bwa avek tol, sa ti fer li bril tre vit.

Administrater distrik Glacis, Jim Moncherry ki ti kot sa dife, ti dir plitar yer apre midi ki Msye Guichard ek son fanmir pou reste kot en vwazen lanmenm obor e ki son de frer pou al reste kot zot ser Port Glaud antretan ki leneseser pe ganny fer pour zot kapab ganny en lakaz North East Point ver semenn prosen ki zot in idantifye an kolaborasyon avek Minister pour Litilizasyon Later ek Lakaz.

Sa i fer dezyenm ka dife pour sa lannen e Msye Madeleine in dir ki zot pe fer en lanket pour determinen kwa ki’n kapab koz sa dife.
I ti ankor en fwa lans lapel avek piblik pour pran enpe plis prekosyon anver zot propriyete.

Ti annan 22 ka dife dan lakaz lannen pase.