Follow us on:

Facebook Twitter LinkedIn YouTube

Archive -News

Bann fitir profesyonnel lasante ek servis sosyal i aprann plis lo valer ‘tolerans’ |06 February 2015

 



Bann zenn ki pe prepar zot pour en karyer dan lasante ek servis sosyal ti yer apremidi aprann plis lo fason pour vin toleran letan zot pou travay avek dimoun malad dan lopital sirtou bann ki annan problenm mantal ek lezot ki en sel kou zot vwar zot ganny tape avek en maladi.

Sa ti pandan lansman valer pour sa mwan ki ‘Tolerans’ ki ti deroul kot Lenstiti Nasyonal pour Lasante ek Letid Sosyal (NIHSS) North East Point.

Sa seremoni pour lans sa enn valer organize par Konsey Nasyonal Lazenes an kolaborasyon avek sa lenstiti, i tonm dan kad progranm ‘Valer Pour Mwan Valer Pour Nou Tou’ ki ti konmanse lannen pase.

Sekreter prensipal pour Lazenes Alain Volcère, pour Sevis Sosyal Linda William-Melanie, depite Servis Lasante Dr Danny Louange, sef egzekitif Konsey Nasyonal Lazenes Madanm Vicky Van Der Westhuizen, plizer lezot envite, ansennyan ek bann etidyan zot menm ti asiste sa seremoni.

Ler i ti adres tou bann ki ti prezan direktris NIHSS, Madanm Marylene Lucas, ti dir ki kot sa lenstiti tolerans i en valer ki form parti zot misyon. Koman bann profesyonnel lasante zot menm ki pe prepar bann zenn pour en karyer dan servis lasante, tolerans i vedir bokou pour zot.

I ti dir ki zot misyon se pour prepar bann profesyonnel lasante ki pou kapab annan konpasyon, ki motive, e konpran soufrans ek douler lezot dimoun.

Plizyer profesyonnel lasante ti parmi bann dimoun ki ti vin partaz zot leksperyans lo sa valer sitan enportan ki tolerans e ki esansyel dan zot travay toulezour kot zot bezwen pas atraver bann diferan sitiasyon ki zot bezwen tolere pour zot kapab kontinyen dan sa profesyon ki zot in swazir.

Madanm Jemma Barbier, en ners an retret apre 35-an dan sa profesyon, ti dir avek sa bann zenn ki tolerans i en gro defi dan servis lasante akoz zot pou bezwen aprann toler bann dimoun ki zot latitid ek fason vwar e fer kesoz i sanze akoz zot maladi.

I ti met lanfaz lo nesesite pour zot respekte zot bann pasyan a tou moman si zot anvi ganny respe sa bann dimoun malad.  

Msye Vincent Isaac in osi en ners pour plizyer lannen avek younit dyaliz avan ki i ti tonm malad e pour plis ki 7-an in soufer avan vwar li dan en sez roulan pour sa dernyen 2-an. Me Msye Isaac i dir in toler son maladi e depi Desanm in retourn dan son travay dan son sez roulan. I ti eksprim gratitid pour son bann koleg ki i dir i toler li parey i ete.

“Toleran i ler ou kapab aksepte en dimoun parey i ete e fason i ete san ki ou bezwen konpar e mezir li avek ou,” Msye Isaac ti dir.


Lo son kote Madanm Gina Michel, ki li osi i en ners fanm saz ki’n dan sa profesyon pour sa dernyen 35-an e ki spesyaliz dan lasante mantal, ti dir bann fitir profesyonnel lasante ki tolerans i en gran valer e verti  ki zot bezwen devlope.

Apre ki i ti’n donn zot plizyer legzanp bann sitiasyon ki in pas ladan, Madanm Michel ti fer rapel bann zenn ki toleran i en valer ki esansyel e ki zot pou bezwen dan nenport domenn servis lasante ki zot swazir pour travay.

Zenn dokter Naomi Adeline ti konfirm sa atraver plizyer senaryo ki i viv toulezour dan klinik ki i deservi e i ti fer resorti ki zot nivo tolerans i ganny teste toulezour.

Thomas Knowles, en santer e mizisyen popiler, ti osi partaz son leksperyans konman en dimoun aveg e i ti eksprim son gratitid pour tou bann ki’n toler tou son bann kapris tou sa letan.

Pandan sa seremoni bann zenn fitir profesyonnel lasante ti osi ekri bann diferan sinifikasyon tolerans e apre partaz avek tou bann ki ti prezan.

 

 

 

» Back to Archive