Dife dan leo Port Launay i anba kontrol |16 February 2015

Sa dife lafore ki ti pe pran depi Sanmdi swar dan leo Port Launay, dan en landrwa ki apel Mont d’Or, i aprezan anba kontrol.

Dapre Divizyon Risk ek Zestyon Dezas (DRDM), tou bann lazans dirzans ti mobilize yer bomaten pour kapab tenny sa dife. Sa i enkli DRDM limenm, Servis Tenny Dife, Lapolis, Departman Lanvironnman ek Brigad Dirzans Port Glaud e osi sorti dan lezot distrik.

Serten volonter in osi donn en koudmen. Antou apepre 125 dimoun enkli 100 direkteman lo teren ti’n mobilize, e zot ti arive kontrol sa dife avek balizaz.

Ver milye lazournen yer, dife ti kanmenm ankor paret pe pran anba zerb e osi dan bann siko dibwa. Lafimen lo diferan parti sa montanny ki ti’n an gran parti brile ti ankor vizib apartir bor lanmer Port Launay. Bann servis, enkli Minister Lasante avek lanbilans, ti ankor lo alert kot stasyon bis Port Launay pour vwar si zot bezwen entervenir.

Sa i dezyenm dife ki pran dan distrik Port Glaud dan de zour apre ki en lot ti detri en porsyon lafore dan en lot landrwa ki apel Deux Arpents Zedi swar ek Vandredi. Dan distrik vwazen Grand Anse, en lakaz ti osi bril konplentman Vandredi.

Si lanket pa ankor determin lakoz sa enn dife, dapre direkter zeneral DRDM Paul Labaleine, sa enn Deux Arpents in koze par en dimoun ki ti pe bril salte kot en laferm. In osi konfirmen ki se aksyon imen ki alorizin sa dife lafore Mont d’Or.

Msye Labaleine in antretan ankor en fwa demann piblik pour respekte ‘ban’ lo met dife ki an viger. In dir ki lotorite pou vin pli sever avek bann dimoun ki pa respekte sa restriksyon.