Ansyen komite Sacs i ganny re-elekte |27 February 2015

Tou bann ansyen manm komite Sosyete Doter e Konpositer Seselwa (Sacs) in ganny re-elekte pour diriz sa lasosiasyon pour sa prosen 5-an. Eleksyon ti fer Merkredi sa semenn kot sant konferans enternasyonal pandan en sesyon organize zis pour deroulman sa eleksyon.

Miting anyel zeneral sa lasosiasyon ti fer an Novanm lannen pase me vi ki ti napa ase manm sa zour sa ti fer ki sa eleksyon ti ganny ranvoye pour plitar.
Sacs ti ganny kree an 2005 avek bi pour promot bann artis mizisyen e osi protez zot bann louvraz.

Bann ansyen manm komite ki’n ganny re-elekte i David Andre konman tyermenn, Jimmy Savy (sekreter), Galen Bresson (trezorye), José Charles, Alain Bacco e Patrick Joseph (manm ordiner).

Msye Andre in dir avek zounal Seychelles NATION ki i byen satisfe avek  lafason ki Sacs in marse pandan sa bann dernyen lannen akoz lasosiasyon in vwar bokou progre.

I ti dir ki bokou artis mizisyen in zwenn lasosiasyon e ki pli gran progre se sa travay pros ki zot annan avek gouvernman pour met anplas sa lezislasyon drwa doter kot tou dimoun e bann lorganizasyon zot pey en larzan atraver Sacs ler zot servi lanmizik bann artis mizisyen dan zot bann fonksyon.

“Sa in ed bokou bann artis ki anrezistre avek Sacs pour resevwar en reveni pour zot louvraz ki zanmen zot ti gannyen dan le pase,” i ti fer remarke.

Myse Andre ti osi dir ki pandan sa prosen 5-an, zot pou kontinyen pouse pour ki bann lezot dimoun e lorganizasyon ki servi travay bann mizisyen zot pey drwa doter e ki lasosiasyon pou osi kontinyen travay pour ankouraz bann lezot artis mizisyen pour zwenn lasosiasyon pour ki zot osi zot a kapab zouir bann benefis adisyonnel pour zot travay.
Sacs i pey reveni drwa doter zis bann artis mizisyen ki anrezistre avek sa lasosiasyon.

Serten manm komite Sacs (portre anler) pandan miting Merkredi

P.J.