Pli gro dife sa lannen i detri en antrepo Le Rocher |02 March 2015

En gran antrepo (warehouse) avek tou bann materyo ek lekipman konstriksyon  ki ti stoke ladan in detri konpletman par dife yer granmaten.

Sa batiman an beton ek tol ki pour lakonpannyen konstriksyon Mahé Design & Build in konstri detrwa mwan pase e i fek vin operasyonnel.

Portparol Servis Tenny Dife ek Sovtaz Msye Jones Madeleine i dir ki zot ti ganny alerte lo sa dife ver 5er 50 granmaten e ti pran zot detrwa minit pour ariv lo teren kot dife ti’n fini pran kontrol sa batiman.

“Sa dife i enn pli gro ziska prezan pour sa lannen e ti pran nou anviron 1erdtan edmi pour met li anba kontrol e plis ki 3erdtan pour tenny li,” Msye Madeleine ti dir.

I ti dir ki menm si dife ti’n tennyen ver 10er, bann zofisye ti bezwen reste lo teren pour obzerv sitiasyon akoz ti ankor annan lafimen pe sorti.

Msye Madeleine i dir ki ziska prezan napa okenn lendikasyon kwa ki’n koz sa dife me i ti fer remarke ki sa servis in ganny alerte ase tar lo sa lensidan.

Dapre serten dimoun ki reste dan sa rezyon depi anviron 5er ou menm pli boner zot ti santi loder lafimen e Madanm Doris Kiwale, ladministratris Les Mamelles ki ti ariv lo teren anviron 6er, i dir dife ti’n gro menm e granmersi bann zofisye tenny dife ti’n arive pe dil avek sitiasyon.

Dapre rapor serten bann travayer etranze sa lakonpannyen ki ti la ler dife ti pran, ti pe esey tenny sa dife zot menm.
Msye Madeleine i dir zot ti deplway 15 zofisye ek 3 gro kanmiyon pour adres sa sitiasyon.