Lafarge i ogmant son kapasite stokaz siman |02 March 2015
Lakonpannyen ki vann siman ‘Lafarge’ e ki baze lo Nouvo Por, in ogmant son kapasite stokaz siman par preski lanmwatye.
Sa in vin atraver en katryenm saylo ki sa lakonpannyen fek enstale. Sa saylo ki kapab stok kat mil tonn siman ti ganny inogire Vandredi bomaten par Minis pour Lenvestisman, Devlopman Antreprenarya ek Linovasyon Biznes Michael Benstrong e direkter zeneral Lafarge Seychelles Farouk Jean-Baptiste.
Sa ti deroul dan prezans Anbasader Franse Geneviève Iancu, direkter zeneral Lafarge pour marse ek biznes lokal Brice-Audren Riche e lezot travayer, partener e kliyan.
In pran wit mwan pour enstal sa saylo e dapre Msye Riche, i dezyenm striktir pli o dan Sesel apre bann moulen divan.
Msye Riche in osi fer remarke ki Lafarge i kwar dan Sesel e i pare pour envestir isi pandan lontan ankor, pour li kontribye plis dan lendistri konstriksyon lokal.
Pour sa i dir, inovasyon, agrandisman e devlopman i enportan, akondisyon ki i soutenab.
« Nou kwar dan Sesel e sa ki nou’n fer ozordi i reponn a zot moto : ‘Mon kontan Sesel’,» i ti dir.
Lo son kote, Msye Jean-Baptiste in fer rapel bann proze dan lekel Lafarge in kontribye. Sa i enkli Erport Enternasyonal Pointe Larue, Nouvo Por, proze lakaz Roche Caïman, plizyer lotel san oubliy konstriksyon en gran kantite lakaz.
In azoute ki malgre lakonplissmann Lafarge isi Sesel, i konfyan ki son lakonpannyen i annan en gran lavenir e ki i pou kontinyen kontribye dan devlopman pei.
Minis Benstrong in eksprim son lapresiasyon pour sa nouvo lenvestisman ki i dir pou kontribye bokou dan devlopman.
“Siman i en komodite ki servi par tou Seselwa. Lendistri konstriksyon i enportan pour ki pei i kontinyen devlope. Lagrandisman sa biznes i en tre bon nouvel. I montre konfyans dan lekonomi par en biznes e partener enportan, » i ti dir.
Lafarge i en lakonpannyen enternasyonal ki oper aparti La France. Lafarge Sesel i son brans lokal e in prezan Sesel pour sa dernyen 45-an. Apard vann siman dan bal, lafarge i sel lakonpannyen isi ki vann siman an grennyen.
