Dife i detri en lot lakaz |04 March 2015

En lot fanmir ankor ti vwar zot san en twa lo zot latet Lendi swar ler zot lakaz ek tou sa ki zot posede ti disparet dan en dife.

Sa lakaz 2 lasanm avek en lot lasanm ki ti an konstriksyon i trouve La Gogue e ti ver 7er 15 ki Lazans Servis Tenny Dife ek Sovtaz ti ganny alerte lo sa lensidan dife.

Msye Jones Madeleine, portparol sa lazans, i dir ki ler zot ti ariv lo teren lakaz ti anflanm e nanryen pa’n ganny sove me erezman personn pa’n ganny dimal menm si en vwazen aze 17-an ti ganny tretman lopital aparaman pour sok.

Msye Madeleine i dir 6 dimoun ti reste dan sa lakaz me selman zis 2 zanfan ek zot paran ki ti la ler dife ti pran.

“Dife ti konmans dan en lasanm me pour lemoman i pa kler kwa ki’n koz sa dife,” Msye Madeleine i dir.

Fas a sa gran logmantasyon dan bann ka dife, Msye Madeleine pe anklor en fwa lans lapel pour dimoun pran plis prekosyon kot zot lakour e minimiz bann risk dife.