Proze desarz lakot Les Mahé |05 March 2015

Zabitan Pointe Larue i anvi vwar en solisyon pour linondasyon avan sa nouvo proze

Miting konsiltativ Sanmdi lo proze desarz lakot Les Mahé

Bann zabitan rezyon lakot les Mahé - Au Cap, Anse Aux Pins, Pointe Larue ek en parti Cascade -- ki pou bezwen konnekte avek sistenm desarz ki PUC pe propoze ti ganny sans pour asiste en premye miting konsiltativ lo sa size wikenn pase.

Sa miting, ki ti deroul dan biro ladministrasyon distrik Pointe Larue Sanmdi, ti’n ganny organize par PUC ek konsiltan Gibbs ki pe travay lo sa proze.
Dan sa miting, bann ki ti prezan ti aprann plis lo bann benefis ki sa proze pour anmennen e sa i enkli rezourd problenm  kot malpropte i mont lo sirfas later sorti dan bann pi perdi ler gro lapli i tonbe, redwir risk maladi e elev nivo ek standar lasante ek lizyenn  parmi lezot.

Bann ki ti prezan, apre ki zot ti’n ganny plizyer leksplikasyon e ekout bann prezantasyon lo sa proze e bann mezir ki pou pran pour minimiz son lenpakt lo lanvironnman, ti ganny sans demann leklersisman e met zot bann konsern devan.

Pour reponn kestyon ti sef egzekitif PUC Msye Phillip Morin ek direkter Gibbs Sesel Msye Gerard Lafortune.

Bann reprezantan sa bann distrik konsernen ti asiste sa miting me malerezman pa bokou zabitan ti’n reponn lapel menm si plizyer lanons ti’n fer dan medya.
Me bann ki ti prezan ti fer sir ki zot lavwa i ganny tande e parmi bann pwen konsern ki ti sorti tre for lo sa size i problenm linondasyon dan distrik Pointe Larue ki ziska prezan napa okenn solisyon lonterm.

En zabitan sa distrik ti lev sa pwen ki ti ganny sipor lezot dimoun dan lasal e sa i vin apre ki zot ti’n konpran ki sa proze ki pe propoze pou nesesit enstal plizyer stasyon laponp dan sa bann distrik me en stasyon tretman desarz dan distrik Pointe Larue.

Konsern i ki pou arive avek sa volim delo ki sa  stasyon pou trete si en problenm i arive vi ki sa distrik i deza annan son problenm linondasyon ki pa ankor rezourd.

Rezon ki ti donnen se ki Pointe Larue i santral e i fasil pour tou desarz transfer la pour tretman.

“I deza annan en stasyon tretman desarz Pointe Larue e i annan bokou problenm avek,” en zabitan ti fer resorti.

Msye Morin ti eksplike ki sa stasyon in servi son letan e ki sa enn ki pe propoze pou pli sofistike e modern e i annan bann lekipman spesyalize ki pou kontrol loder, pran an kont koupir kouran, parmi lezot keksoz e ki i’n ganny design pour ki i annan mwens lenpakt lo lanvironnman.

I ti osi eksplike ki tou bann delo pou ganny trete a en nivo ki i pour kapab ganny reservi pour irigasyon.

Parmi bann lezot pwen ki ti sorti se akoz pa agrandi stasyon tretman ki pe al fer Ile Soleil, akoz pa anvoy tou tretman Providence, tarif desarz ki pou en kou anplis lo bann zabitan, pour nonm enn de.

Msye Morin ti asir bann zabitan ki tou zot konsern ek pwen pou ganny pran an konsiderasyon e ki sa i zis en premye miting.  

Sa proze i ekspekte fer an 2 faz e bann lakaz ki dan bann rezyon plato zot ekspekte konnekte avan e deza Msye Morin i dir i annan 2  lazans finansman ki’n montre lentere pour finans sa proze.  Antou 3400 dan lakaz i ekspekte konnekte lo sa sistenm desarz ler sa proze i konplete ver 2018 si tou keksoz i al dapre plan.