‘Valer pour mwan, Valer pour nou tou’ |05 March 2015

Mwan Mars i ganny dedye a ‘Rezilyans’

Dan kad son kanpanny ‘Valer pour mwan, Valer pour nou tou’ kot depi lannen pase i pe promot en valer tou le mwan, Konsey Nasyonal Lazenes (SNYC) in dedye mwan mars a ‘rezilyans’.

Me ki savedir rezilyans ? Se koumsa ki direkter CARE (Committee for Awareness, Resilience and Education against substance abuse) Robert Ahweng i defini sa verti:

 « Rezilyans i sa kapasite ki en dimoun i annan pour pran tou responsabilite pour son lavi, e an fezan sa, devlop kapasite pour adopte bann swa en kalite lavi ki permet li protez son lekor, ouswa ler i ganny difikilte i kapab rekipere, oubyen aprann pour fer fas avek difikilte an restan for, determinen e pozitiv. »

Andotmo, rezilyans i sa kapasite pour vin for e reziste kont bann move tantasyon.

Msye Ahweng in fer rapel ki sa ‘R’ dan CARE i vedir ‘rezilyans’, e ki sa lasosiasyon pe travay lo la depi sa 20-an ki i egziste.

I pa’n en azar donk si SNYC in swazir pour promot sa valer an kolaborasyon avek CARE. Parey Msye Ahweng in ankor fer resorti, se “ansanm ki nou pou kapab anmenn sa lalit ki enkli lalit kont drog ek lalkol ».

Se zisteman kot CARE House kot Freedom Square ki sa mwan dedye a rezilyans ti ofisyelman lanse yer apremidi. Seremoni ti deroul dan prezans Minis pour Zafer Sosyal, Devlopman Kominoter ek Spor Vincent Meriton, sekreter prensipal pour Lazenes Alain Volcère, sef egzekitif SNYC Vicky Van Der Westhuizen, son depite Alvin Laurence, tyermenn CARE Madanm Sarah René e en group zanfan avek zot ansennyan.

Dan en pti diskour, Madanm René ti fer remarke ki rezilyans i en keksoz ki pa kapab ganny ansennyen dan lekol.
“Ou bezwen ou menm vin rezilyan,” i ti dir.

Madanm René ti azoute ki i anmenmtan malere ki nou devret koz lo sa size akoz lavi i devret en zoli parkour me nou’n plito fer li vin en voyaz danzere. I ti sepandan dir ki sa i en realite ki nou devret lalit avek e ki i kanmenm annan lespwar pour lavenir.

Tyermenn CARE ti soulinyen ki pour en zanfan vin rezilyan, i bezwen grandi dan en lanvironnman apopriye e kot i annan lezot valer ki permet sa. Sa i enkli kouraz, determinasyon, lanmour prop, motivasyon, vizyon, eksetera. Koman en solisyon, i ti demann paran pour pas plis letan avek zot zanfan pour zot kapab anrasin sa bann valer dan zot. Kot fanmiy pa reisi, Madanm René in lans en lapel pour ki lasosyete i pran relev e garanti sekirite zanfan.
« Lakle ladan se lanmour. Fodre zanfan i konnekte emosyonnelman avek zot menm e avek tou dimoun ki antour zot, » i ti dir.

Naomie Evenor, en zenn fiy ki ti vin en orfelen a laz onz an, ti rakonte ki fason konman en lorganizasyon, CARE in kontribye pour fer li vin rezilyan, vin en zenn responsab, e « en dimoun for e brav » parey bann ki konn li i dekri li. Annefe, Manmzel Evenor in termin son letid ‘A levels’ e pe aspire pour vin en sikolog. Parey Madanm René, li osi in dir ki fodre zanmen perdi lespwar.

« Ler tou in mor, lespwar i sa dernyen dife ki reste alimen. Nou devret ed en zanfan ou en zenn ki’n perdi olye zis kritik li. I pa normal pour ou reste en viktim. Vin rezilyan e reste determinen, » i ti dir.

En lot zenn fiy, Rosalette Dodin ki en travayer sosyal ki an se moman pe prepar en degre dan Liniversite Sesel, in osi dir ki son leksperyans dan Klib CARE in ede dan son rezilyans e in zwe en gran rol dan son swa karyer.

Seremoni lansman valer ‘Rezilyans’ ti osi enkli en pyes teat par Klib CARE lekol segonder Anse Boileau. Moral sa pyes sete pour pran legzanp torti e met nou likou anndan ler danze i vini e protez nou anba nou lakok. Christina Etienne ti resit en pti poenm e dan en sanson, bann zanfan ti fer rapel sa mesaz :
 « Dir drog ek lalkol non mersi mon korek ! »