Gro lapli i normal pour sa peryod lannen |09 March 2015

Gro lapli ki’n tonbe sa wikenn enpe partou e sirtou pli for dan rezyon sid i normal e osi normal i sa gro loraz ek zekler, Msye Vincent Amelie, zofisye meteorolozi  sinyor, ti dir yer.

Msye Amelie i dir ki nou ankor dan sezon lapli menm si lapli pa pe tonm parey labitid.

Swivan sa go lapli ek loraz dan rezyon sid depi Sanmdi apremidi e osi yer, in napa gran dega me yer bomaten gro zekler ki ti tape e tase ater dan lakaz Madanm Marguerite Joseph anler dan leo Pointe Au Sel ti pers en pti trou e detrwa pti zekli tiles ti fann lo Madanm Joseph ki ti bezwen raport Lopital Anse Royale pour sok.

Dan en lot lakaz detrwa met pli lwen enn fiy Madanm Joseph ti osi santi enpe sekous letan i ti pe atrap en tiyo dan son lakwizin me erezman personn pa’n ganny okenn dimal.

Osi yer kouran ti koupe dan rezyon sid pour plizyer erdtan konmansman depi apre 9er bomaten apre ki en kanmiyon STAR Seychelles ki ti sorti kot Lotel Four Seasons pe desann anvil ti tap avek e kas en poto elektrik Anse Aux Poules Bleues.

Dapre portparol lapolis drayver sa kanmiyon, en zonm 38-an e en lot zonm ki ti pasaze dan sa kanmiyon, pa’n ganny okenn dimal.

Drayver i dir i ti rankontre serten difikilte ek son transpor ki ti fer li perdi kontrol e al tap avek sa poto elektrik.