Dife i detri en supermarket ek en lakaz |18 March 2015

Dife in konpletman detri en supermarket Anse Royale yer granmaten e osi en lakaz Baie Lazare Dimans swar.
Erezman personn pa’n ganny blese dan toulede lensidan.

Dan ka sa dife Anse Royale yer granmaten kot sa magazen in konpletman brile, portparol Servis Tenny Dife ek Sovtaz Msye Jones Madeleine ti dir yer ki ti anviron 1er30 granmaten ki Kordgard Santral ti resevwar en koud telefonn pour enform stasyon Servis Tenny Dife Anse Boileau e apre stasyon anvil ki sa laboutik ti anflanm.

Msye Madeleine ti dir ki deswit trwa kanmiyon ti ganny deplwaye, enn sorti Anse Boileau e de lezot sorti lavil pour al donn lasistans.  Malerezman enn sa bann kanmiyon sorti anvil ti savire kot ronpwen Roche Caïman pandan ki i ti  pe al ver Anse Royale, me deswit en lot ti ganny anvoye pour ranplas li.  
De parmi trwa zofisye ti raport lopital pour tretman miner e apre ganny large.

Dapre Msye Madeleine ler zot ti ariv Anse Royale supermarket SPR ki trouve lot kote semen kot piblik i kontan fer piknik pa tro lwen avek Kaz Kreol, ti konpletman anflanm e zot ti menm servi delo lanmar obor laboutik pour kapab konbat sa dife.

«Pa tou keksoz ki’n ganny brile konpletman me endirekteman zot in ganny afekte par lasaler,» Msye Madeleine ti azoute.
Antretan, Dimans swar dan anviron 9er45 en lot fanmir ti perdi zot lakaz dan en dife Baie Lazare.

Sa fanmir 4 dimoun pa ti reisi sov nanryen e ler zofisye Servis Tenny Dife ti ariv kot sa lakaz, ki sitie deryer simityer, ti konpletman anflanm.

Ler dife ti deklare ti annan kat dimoun dan sa lakaz – Madanm Jemma Rose, son de garson aze 33-an ek 38-an e en madanm 84-an.

Msye Madeleine i dir ki enn sa garson ki ti pe dormi i dir ki ler i ti sote i ti vwar dife dan plafon.
Msye Madeleine i dir ki pour lemoman lakoz toulede dife pa ankor determinen e lanket pe kontinyen.