Komite ‘Lasante Nou Nasyon’ i entansifye zefor pour fer dimoun pran responsabilite zot lasante |26 March 2015

Komite ‘Lasante Nou Nasyon’ dan Minister Lasante pe entansifye son zefor pour asire ki dimoun dan zot lakour i ganny mesaz ki nou lasante i nou responsabilite e sa i konmans dan lakour kot nou viv.

Sa komite ki son responsab i Madanm Patricia Rene pe zwenn avek plizyer son bann partener e lezot dimoun  konsernen dan kominote pour fer ki dimoun i ganny enformen e edike lo sa size.   

Deza bann manm sa komite in zwenn reprezantan diferan medya dan pei ki ti enkli reprezantan Komisyon Medya Sesel e responsab lasosiasyon medya. Bi se pour rod linisyativ ek lide sorti kot bann dimoun ki travay dan sa domenn lo fason pli enteresan e inovatif pour edik e konsyantiz dimoun.
Semenn pase sa komite ti zwenn avek bann administrater distrik.

«Bann DA se zot ki pli pre avek bann dimoun dan kominote e si nou pa enkli zot ki pros avek kominote nou pa pou reisir dan sa kanpanny. Nou bi se pour asire ki zot pran ownership sa tenm e anmenn li dan kominote,» Madanm Rene ti eksplik bann DA.

Madanm Rene ti osi dir ki tou keksoz ki an relasyon avek fason en endividi i fonksyonnen i annan son baz dan lakour. Ki mannyer en dimoun i viv, ki mannyer i ganny elve, ki bann keksoz i manze e fason i manze tou i konmans dan lakour.

«Nou anvi met lanfaz lo fer dimoun realize ki bokou keksoz nou kapab inisye nou menm dan lakour pour annan en pli gran lenpak lo nivo lasosyete. Alor si nou pran sa tenm o serye i pou annan en pli gran lenpakt pour nou amelyor lasante nou nasyon,» Madanm Rene ti dir.

I ti fer resorti ki atraver sa bann rankont, komite pe diskite e vwar ansanm avek zot ki mannyer zot kapab ede pour pas sa mesaz e ki mannyer zot  kapab pran sa tenm, fer aktivite o nivo distrik e kominote pour anmenn sa mesaz ‘Mon Lasante Mon Responsabilite’ kot bann dimoun i reste.

Madanm Rene i dir plizyer aktivite pou ganny organize pandan sa lannen me komite pou la pour donn sipor bann lide ki son bann diferan partener i vin avek.

Dokter Conrad Shamlaye, enn bann manm sa komite, i dir ki si nou vreman oule ki sa tenm i efektiv e i marse fodre i sorti kot Minister Lasante dan lavil e al dan kominote kot dimoun i ete e o sant bann distrik se bann DA ki pou asire ki tou dimoun i konpran vreman ki nou lasante i konmans dan lakour.

Komite ‘Lasante Nou Nasyon’ ti ganny met ansanm an 2013 pour travay avek diferan partener, group e mouvman parmi lezot dan sosyete pour edik dimoun e fer zot sanz persepsyon ek limaz ki zot annan vizavi Minister Lasante.

Lannen pase sa komite ti adopte tenm ‘Mon Lasante Mon Responsabilite’ avek bi kontinyen ankouraz dimoun pour pran ansarz e responsabilite zot lasante akoz lasante sak endividi i son responsabilite e non pa responsabilite Minister Lasante. Minister i responsab pour donn nou swen neseser ek latizann dan ka ki nou malad me pour asire ki nou pa malad i nou responsabilite.

«In annan serten reisit lo travay ki’n ganny fer ziska prezan,» Madanm Rene ti dir.

Pour sa lannen sa komite in mazin en kontinite dan son travay e in agrandi tenm lannen pase e fer li vin ‘Mon Lasante Mon Responsabilite i konmans dan Lakour’.