Josemée Marie Marengo i fet 100-an |30 March 2015

Pour ariv ziska 100-an e vin en santener lo later i sirman pa en leksplwa fasil.

Madanm Josemée Marie Marengo, en zabitan Belonie, in zwenn kat lezot santener dan distrik St Louis kan i ti fet son lanniverser Sanmdi.
I ti fet son lanniverser avek en zanmi e vwazen Msye Philip Tirant, ki li i ti ganny 71-an.

Antoure avek son bann pti zanfan, aryer pti zanfan, lezot manm fanmir ek zanmi, ‘Manme’ parey bokou  dimoun i konn li, ti fet sa gran lokazyon dan en lanmes spesyal e en dezennen kot son lakour.

Lanmes ti selebre par Per David Alcindor ki ti donn benediksyon Madanm Marengo e swete ki i viv lontan ankor dan lafwa ek lazwa e ki i reste an bonn sante.

«I pa en levennman ki ariv souvan e i en lazwa pour sa fanmir. Okip li byen, donn li zot latansyon pour ki i kapab fet ankor lanniverser,» Per Alcindor ti demande.

Madanm Marengo i ankor relativman an bonn sante menm si i pa vwar e tann tro byen e i fatig vitman. Parfwa osi i santi li sou. Sanmdi, i pa ti kapab koup son gato me i ti sant laplipar kantik pandan lanmes.

Dan son lavi Madanm Marengo in ganny de zanfan ki tou le de in mor. I an se moman reste avek son pti zanfan Marilyn. I osi granmer santer popiler Elijah ek Mersener.

Apard en pti pe letan ki in pase Mont Buxton, Madanm Marengo in toultan reste St Louis. Letan i ti ankor travay, in pas bokou letan fer louvraz domestik kot Lanmisyon Katolik kot in travay Kouvan St Joseph de Cluny e osi avek Monsennyer Olivier Maradan. I dir ki letan i ti pli zenn, i ti osi kontan plant fler ek legim.

Pour son lanniverser e osi konman rekonnesans pour son kontribisyon dan lasosyete, Madanm Marie in osi resevwar son meday santener e en kado sorti kot Prezidan Larepiblik Msye James Michel. Se Minis pour Zafer Sosyal, Devlopman Kominoter ek Spor Msye Vincent Meriton ki ti prezant li son meday kan i ti rann li en pti vizit Vandredi. Ladministrater distrik St Louis Rachel Joseph ti prezant li son kado lo non Prezidan.