Airtel Music Award 2014 - Sandra ek Jean-Marc Volcy, meyer artis pour lannen 2014 |30 March 2015

Le de gran gannyan i resevwar zot trofe avek Msye Dina

Sandra ek Jean-Marc Volcy i le de meyer artis Seselwa pour lannen 2014. Se zot ki gran venker ‘Airtel Music Award’ ki ti fer Sanmdi swar dan Sant Konferans Enternasyonal (ICCS).

Sandra in ganny pri meyer artis feminen avek sanson ‘Leko tanbour’ alor ki Jean-Marc Volcy in ranport sa pri lo kote maskilen avek sanson ‘Dyelelo’ ki ti osi ganny vote meyer sanson an 2014.

Sandra ti gran vedet lasware avek an tou trwa pri ki i ti ranporte. Sa de lot ti pour meyer sanson tradisyonnel avek sanson ‘Bat sa lapo’ e meyer kolaborasyon avek sanson ‘Mon pa en Sen’ ki in ranporte avek Jakim .

«Trwa award dan trwa kategori ! Mon remersye mon fanmir, zanmi e Bon Dye ki’n ed mwan realiz sa sikse. Ozordi swar nou tou artis nou’n gannyan».
Se koumsa ki Sandra ti eksprim li apre ki i ti’n kolekte son bann pri.

Tandi ki Jean-Marc Volcy, ti fer resorti son rekonnesans pour bann ki siport artis e kiltir Seselwa.
«Mon dir mersi tou dimoun ki’n vini aswar. Mersi pour siport lanmizik Seselwa. Mersi pour siport kiltir Seselwa. Si nou pa fer sa nou pou perdi nou kiltir.

Tan ki mon ankor vivan, mon pou touzour prezerv nou kiltir. Nou langaz, nou lanmizik in dir tou dan sa travay ki mon’n fer. Mon dedye sa pri a tou artis Seselwa e a kiltir Seselwa,» Jean-Marc ti dir.

En lot artis ki ti ganny byen rekonpanse Sanmdi se Ashley Barallon. I ti ganny pri meyer zenn artis e i ti osi ganny vote meyer par piblik. Sa i vedir ki i ti egalman ranport pri swa piblik.

Se de artis veteran ki ti konplet podyonm ‘Airtel Music Award 2014’. Sa se Pat Prosper ki ti ganny deklare meyer par son bann koleg mizisyen e santer e donk ranport pri ofer par lasosiasyon mizisyen Seymas. Lot ti David Philoe ki ti ranport pri onorer.

Pandan spektak, bann artis ti ganny akonpannyen live par benn ‘Zenith’. Bann manm ‘Zenith’ ti osi montre zot gran talan ler zot ti akonpanny artis zanbyenn Mampi ki ti partisip dan lasware koman envite doner. Piblik ki ti’n ranpli lasal ICCS ti osi apresye bokou bann morso ladans son pei ki sa artis e son trwa danser ti’n vin ofer.

Alafen spektak, Minis St Ange ki pa ti kapab reste san dir en pti mo, ti felisit bann artis pour zot travay e sikse.
«Se sa lakiltir,» i ti dir.

I ti remersye lakonpannyen Airtel pour organiz sa konkour e pour ede promot kiltir Seselwa.

Lo son kote, direkter egzekitif Airtel Amadou Dina in remersye tou artis ki’n pran par dan ‘Airtel Music Award’ 2014 e in swete ki zot osi fer sikse an deor Sesel. In  promet ki sa konkour pou pli bon ankor lannen prosenn.

«Mon remersye tou artis ki’n partisipe. Mon espere ki en zour nou a vwar en artis Seselwa lo lasenn enternasyonal parey Mampi. Lannen prosenn spektak pou pli bon ankor,» in promet.