Pri elektrisite i desann par preski lanmwatye |01 April 2015

Apartir ozordi, pri elektrisite in desann par preski lanmwatye. Sa i aplik pour konsonmasyon domestik – setadir bann lakour – osi ki pour biznes.

Dapre nouvo tarif ki Komisyon Lenerzi Sesel (SEC) in anonse, pri elektrisite in redwir par 76 sou lo sak inite e sa i reprezant en rediksyon an mwayenn 48 poursan.

Sa komisyon in eksplike ki sa rediksyon i anliny avek son polisi pour aziste pri elektrisite tou le trwa mwan baze lo pri karbiran.

Nou a rapel ki dernyen fwa ki ti annan sa lazisteman ti an Zanvye sa lannen, kan pri elektrisite ti desann par zis en sou par inite.

Sa rediksyon i osi swiv lanons ki Prezidan James Michel ti fer dan son diskour Leta Lanasyon le 26 Fevriye sa lannen, kot i ti dir ki gouvernman pou fer desann pri elektrisite.

Lo son kote, Korporasyon Litilite Piblik (PUC) in donn detay lo bann sanzman ki sa azisteman pou anmennen lo bil elektrisite tou le mwan. Dapre Msye Wingate Mondon, ki sef zofisye komersyal kot PUC, en dimoun ki avan ti pe konsonm 250 inite elektrisite e pey R395.80, i pou aprezan pey selman R205.80. Si ou konsonmasyon ti 300 inite e ou ti pe pey 478.30 ou pou aprezan pey R250.30. Pour en konsonmasyon 350 inite, pri pou sorti R651.80 pou desann 385.50.

Msye Mondon in osi eksplike ki malgre sa nouvo tarif pe pran lefe apartir ozordi, i pou selman aparet lo bil elektrisite ki pou sorti pour mwan Me. I dir ki sa i akoz PUC i bezwen pran en pe letan pour sanz tarif lo son bann masin. Sa i vedir ki kan en kliyan pou resevwar son bil pour mwan Avril, i pa pou konnen egzakteman konbyen i dwa avan ki i al kot kontwar PUC pour peye.

Msye Mondon in dir ki sa sitiasyon ti egziste depi avan, me ki avek sa gran sanzman dan pri diferans lo bil pou pli signifikan.

I pe demann bann kliyan ki annan okenn dout e santi bezwen serten leklersisman avan zot pey zot bil pour demann lenformasyon kot kontwar PUC.

In antretan anonse ki PUC pe travay lo en nouvo progranm ki a dan lefitir permet li aziste bil omoman ki tarif i sanze.

PUC in osi fer resorti ki avek sa nouvo tarif, i pa pe fer okenn lekonomi lo sa bes ki in benefisye lo pri dyezel. Sa lakonpanyen in dir ki in plito deside pas tou sa benefis lo konsomater.