Bibliotek Nasyonal i konmemor Lazournen Drwa Doter |20 April 2015

Bibliotek Nasyonal, ki en seksyon departman kiltir, ti organiz en seri aktivite Sanmdi pour konmemor Lazournen Drwa Doter, oubyen ‘World Copyright Day’ an Angle.

Bann aktivite, ki ti deroul pandan en zournen antye, ti vize a bann zanfan osi byen ki adilt. Bann partisipan ti bann manm Bibliotek Nasyonal osi byen ki bann zanfan Foyer de Nazareth. Lezot dimoun ki ti la ti ganny sans pour anrezistre konman manm Bibliotek e konmans pret liv.

Dapre en organizater sa lazournen, Madanm Stella Bradburn, lobzektif sete pour devlop en lentere pour lektir dan bann zanfan e anmenmtan pous paran pour ankouraz zot zanfan pour lir.

Biblioteker prensipal, Madanm Anne Mary Robert, ti azoute ki Bibliotek Nasyonal i anvi devlop en lanmour pour lektir dan bann zanfan e fer sa aktivite vin en plezir pour zot.

«Dan tou konponan bann aktivite ki nou’n organize i annan lektir, ki tre enportan pour devlopman zanfan,» Madanm Robert ti dir.

Apard asiste bann latelye lektir ek lekritir e prezantasyon lo diferan liv, bann zanfan avek zot paran ki ti prezan Sanmdi ti osi dekouver ki mannyer pour aprann lir atraver lapoezi, sanson, film, desen e osi zwe.

Pour ki bann zanfan ek paran i kapab al kontinyen lir kot lakour, zot ti kapab aste liv avek bann libreri ki ti’n deplas kot Bibliotek pour sa lokazyon. Bann pli sanse ti menm ganny kado liv avek Bibliotek Nasyonal.

Bann aktivite pour sa lazournen in ganny finanse par lakonpannyen konstriksyon Vijay, Sahajanand ek Laxmi Trading.