Follow us on:

Facebook Twitter LinkedIn YouTube

Archive -President Michel

Dirizan lopozisyon dan Lasanble i diskit 3 size enportan avek Prezidan |24 April 2015

 

 

 



Rediksyon dan pri lavi, linite ek stabilite, lalit kont trafik drog i 3 zize ki Msye David Pierre, dirizan lopozisyon dan Lasanble Nasyonal ti diskite yer dan en rankont avek Prezidan James Michel State House.

Msye Pierre ti dir avek lapres apre en lot sa bann rankont regilye ki i fer avek  Prezidan Michel kot zot diskit bann size nasyonal ki pe preokip tou dimoun ki sa 3 zize zot tre enportan e ki tou dimoun i konsernen avek.

«Lo size pri lavi, i enportan pour asire ki dimoun avek saler debaz e ki mwen avantaze zot bezwen kapab fer viv zot fanmir e nou bezwen vwar ki bann komodite debaz zot pli abordab», Msye Pierre i dir.

I ti fer remarke ki menm si STC (Seychelles Trading Company) i annan en lalis sa bann komodite esansyel, sa lalis i bezwen agrandi pour enkli bann prodwi pour pti baba ki ekstrememan ser.

«Mon’n rekomande ki gouvernman i rod posibilite pour redwir pri bann prodwi pour pti baba,» Msye Pierre ti dir.
Lo size linite ek stabilite, Msye Pierre i dir sa i enportan pour nou devlopman ekonomik.

«I enportan pour nou  kontinyen annan  diversite dan lopinyon akoz sa i en sinny ki nou demokrasi i an bonn sante  me nou bezwen  fer sa dan  linite ek stabilite,» i ti azoute.

An sa ki konsern lalit kont trafik drog, Msye Pierre i dir ki sa i bezwen reste for e  enn ki nasyonal akoz i enportan ki nou rod fason pour fer ki nou popilasyon lazenes i aret ganny afekte par sa bann sibstans akoz nou tou nou konn son lenpakt lo nou zenn, lo lafanmir e lo lafors travay nou pei.

«Nou bezwen ranforsi nou zefor pour asire ki sa bann sibstans zot aret antre dan nou pei,» Msye Pierre ti dir.

 

 

 

 

» Back to Archive