Zanfan pe ganny prepare pour konpetisyon ‘Zenn artis lemonn kreolofonn’ |25 April 2015

Konsey Nasyonal pour Lar (Nac)  in organiz en ‘Holiday Arts Workshop’ ki ti komans lendi le 20 Avril e fini le 23 Avril. Bi sa latelye kat zour ti pour prepar bann zanfan pour pran par dan konpetisyon ‘Zenn artis lemonn kreolofonn’ ¬¬¬¬¬dan Festival Kreol an Oktob.

Pour sa latelye pran plas, kordibater devlopman Lar, Madanm Vivienne Croisée,  ti anvoy en let kot Minister Ledikasyon pour demande pour selekte en serten nonm manrmay dan sak lekol espesyalman bann ki annan lentere dan lar.

«Pour zot fer zot seleksyon nou ti dir zot bann diferan kriter ki nou ti ava kontan vwar e vwala zot ti anvoy manrmay kot nou. Dan vakans Avril nou pran manrmay komansman lakres ziska P6 e dan vakans Out nou pran manrmay segonder ziska pos segonder,» Madanm Croisee in eksplike.

Sa lannen in annan 38 zanfan ki’n reponn lapel. I annan bann artis ouswa ansenyan lar ki’n vin fasilit sa bann latelye. Zot in montre manrmay fason pour desinen, aplik bann diferan lapentir, atrap en penso eksetera. Koumsa, zot ganny sans pour travay avek bann artis renonmen ki zot in deza tann nonmen ou ki zot in rankontre li an personn.

Zanfan i osi ganny loportinite pour ganny bann premye leksperyans dan zot lavi. Par egzanp, pour desin lo en kannvas. Dan sa latelye, zot komans desin lo papye me zot prodwi final i ganny ankadre lo en kannvas.

«I enteresan pour vwar ki i annan bann zenn ki’n pas atraver nou bann latelye dan bann lannen oparavan ki kekfwa ozordi zour ou vwar zot in vin en fasilitater sa latelyer aprezan. Nac i souvan vwar ki bann gannyan konpetisyon Zenn Artis i  bann zanfan ki’n pas atraver sa bann latelye vi ki zot in byen ganny prepare. Pour sa konpetisyon napa zis Seselwa, i osi annan bann lezot zenn sorti dan lezot pei Losean Endyen ki partisipe,» Madanm Croisee in dir.

I azoute ki i annan bokou manrmay ki pran letid dan lar me zot pa kontiny li koman en karyer parske zot santi ki napa debousman. I osi annan paran ki pa pe vwar lenportans zot zanfan pran lar koman en karyer, zot pran lar koman en keksoz enferyer.

«I toutafe okontrer akoz ler ou gete lar i metye ki anmenn bokou benefis ekonomik, vi ki pour le moman dan nou lendistri touris nou pe target plis lo labote Sesel me nou pa pe met lanfaz lo son kote kiltirel e lar i son kote kiltirel. E nou isi nou pou enkilke sa laspe dan zanfan a en tre zenn laz pour ki zot plitar pans diferaman e paran osi parey,» i dir.

Paran i ganny envite alafen latelye pour vin vwar travay ki zot bann zanfan in fer. Zot osi ganny sans diskit avek bann fasilitater pour dekouver ki talan ki zot zanfan i annan.

Madanm Croisée ti dir ki zot in dekouver ki i annan paran apre ki zot zanfan in fini sa latelye, zot kontinyen kot lakour. I azoute ki sa i en keksoz ki zot pa ti fer avan e zot menm al aste lekipman pour ed zot zanfan fer progre e bouz devan.

Danny Sopha, enn bann fasilitater sa latelye, ti dir avek zournal Seychelles NATION ki topik ki bann zanfan pe travay lo la sa fwasi i metye tradisyonnel.

Msye Sopha, ki’n en artis professyonel  pour 29-an, i dir ki apar ki lar bann zanfan i osi aprann keksoz lo laspe kiltirel e tradisyonnel.

«Sa i pou ed zot gard listwar zot bann gran paran e zot pou kapab konpar travay lontan avek konmela. Sa latelye i montre zot lenportans e i en lenfliyans pour zot vi ki zot travay dan en lanvironnman avek manrmay ki annan plis lentere dan lar. An zeneral i en leksperyans anmizan e i ed zot ganny bokou konfidans,» i ti konklir.