Prezidan Michel i zwenn Depite Premye Minis Moris e Prezidan Konsey Rezyonal Lareinyon |25 April 2015

Prezidan James Michel ti yer apremidi rankontre Depite Premye Minis Morisyen, Msye Xavier Duval, e Prezidan Konsey Rezyonal la Reinyon, Msye Didier Robert.  
Sa ti pandan de rankont separe State House. Minis pour Zafer Etranzer ek Transpor, Msye Joël Morgan, e son omolog pour Tourizm e Kiltir, Msye Alain St Ange, ti osi prezan pandan le de rankont.

Msye Robert ti lo son kote akonpannyen par Anbasader Franse Lionel Majesté-Larrouy.

Le de dirizyan rezyonal i aktyelman Sesel kot zot in ganny envite pour asiste Karnaval Enternasyonal Victoria.

Koman de partener enportan dan devlopman konsep Iles Vanilles, Prezidan Michel ti abord sa size avek zot, kot zot ti diskit posibilite organiz bann krwazyer otour bann zil Losean Endyen, parmi lezot progranm touristik.  

Msye Duval ek Msye Robert ti fer remarke ki Karnaval Enternasyonal Victoria dan limenm i non selman permet lesanz kiltirel ant bann pei, me in vin en moman tre for lo kalandriye Iles Vanilles. Zot ti eksprim swe ki bann zil Losean Endyen i kapab rankontre pli souvan posib pour zot kapab ranforsi bann lyen lanmitye ki deza egziste.

Depite Premye Minis Morisyen e Prezidan konsey Rezyonal Lareinyon ti profite pour felisit Sesel pour organiz en karnaval sa lanpler.

Le trwa dirizan ti osi koz lo size lanvironnman e sanzman klima ki krisyal pour sirvi nou bann zil. Lo sa size, Msye Robert ti annan en bon nouvel pour Prezidan Michel. I ti dir ki sa pye kokodmer ki Sesel in ofer La Reinyon pe byen pouse, e ki sa i senboliz lafors lanmitye ant le de pei.