‘Pti Zan, Zann ek Loulou’ i retourn ankor! |02 May 2015

Loulou i zwe annan larzan pour li kapab marye avek Zann. Son riz se plito fer Zann  gra pour ki li ek son bann lezot konper loulou i kapab ganny sa zenn fiy pour manze. Zis Pti Zan, frer Zann, ki kapab met en lord avek Loulou e anpes sa arive, pandan ki bann konper i kontinyen demann en sel kestyon : « I’n gra, pa ankor gra ? »

Bokou nou in aprann sa zistwar atraver rakontaz granmoun. Oubyen, nou’n ganny sans lir li ler nou ti ankor pti. Dan bann lannen 80, Minister Ledikasyon ti menm servi sa banndesinen ki sorti dan foklor Seselwa konman en metod lektir dan lekol. Malerezman, depi en pe letan sa liv ti’n preski konpletman disparet.

Nou pou aprezan kapab relir sa zistwar amizan la ki Lenstiti Kreol Enternasyonal in deside repibliy li. Sa dezyenm edisyon, ki osi annan son laform elektronik oubyen e-book e ki’n prodwir avek led finansyel Lotorite Laviasyon Sivil Sesel (SCAA), ti ofisyelman lanse dan en pti seremoni kot Lenstiti Kreol Merkredi par ekriven Lise Morel.

Manmzel Morel, ki osi en travayer SCAA, ti dir ki dan kad son lobzektif pour met Sesel avan tou, sa lorganizasyon i kwar dan ledikasyon ek devlopman zanfan. I ti azoute ki en pwen kle dan sa devlopman se lektir dan langaz maternel ki a son tour permet kreasyon lekspresyon.

Lansman dezyenm edisyon ‘Pti Zan, Zann ek Loulou’ ti form par progranm Semenn Lektir ki organize otour Lazournen Drwa Doter ki selebre le 23 Avril. I ti deroul dan prezans Minis pour Tourizm ek Kiltir Alain St Ange, dirizan lopozisyon dan Lasanble Nasyonal David Pierre e plizyer zofisye SCAA, kiltir, tourizm ek ledikasyon osi byen ki bann ekriven.

Bann envite ki ti la ti ganny sans apresye en reprezantasyon teatral sa zistwar prezante par Lekol Teat Praslin. Dan en melanz tradisyon ek modernite, bann zanfan lekol ti osi ofer lodyans en seans lektir modern lo laptop, tablet, ipad ou telefonn mobil.

Sete sef egzekitif SCAA Gilbert Faure e Francesca Abel – fiy gran ekriven Seselwa Antoine Abel – ki ti ganny privilez pour siny kopi bann liv avan ki zot ti ganny ofer avek bann partener e met anvant.

Dapre direktris Lenstiti Kreol Enternasyonal Penda Choppy, Pti Zan Zann ek Loulou in ganny swazir pour repibliye akoz i ti premye banndesinen an kreol e i parmi zistwar pli koni dan nou kiltir. Dapre li, i osi donn moral dapre nou bann tradisyon e i anrisir nou langaz avek bann lekspresyon. Madanm Choppy i kwar ki piblikasyon bann liv parey pou ede reanmenn lalektir non selman dan laprantisaz, me osi dan lavi toulezour.

Sekreter prensipal pour Ledikasyon, Merida Delcy, in osi souliny lenportans lektir sirtou pour bann zanfan. I’n dir ki Semenn Lektir i lokazyon pour motiv zanfan pour lir e pour ankouraz paran pour ofer zot zanfan en liv konman kado. Madanm Delcy in remersye SCAA pour reanmenn zanfan ver lektir ki i dir i labaz laprantisaz. I’n profite pour demann lezot lorganizasyon ek biznes pour kontribye dan ledikasyon zanfan.
En fason pour zot fer sa se ede pour aste liv pour bann bibliotek lekol.

M.S.