Travayer i ralye dan lanmes pou mark zot lafet |02 May 2015

En gran nonm travayer ansanm avek lezot fidel sorti enpe partou lo Mahé ti ralye kot Legliz St Joseph Anse Royale yer pour sa gran randevou parey i tradisyon toulezan pour asiste lanmes Patron bann travayer St Joseph avan ki zot ti al partisip dan bann diferan aktivite pour selebre zot lafet.

Lanmes Anse Royale yer bomaten ti prezide par pret laparwas Roger De Commarmond vi ki Monsennyer Denis Wiehe ti’n al prezid lanmes dan parwas St Joseph Grand Anse Praslin kot in osi al donn sipor bann parwasyen laba ki fek perdi zot pret, Per Charles.

Parmi bann ki ti asiste lanmes Anse Royale yer bomaten pour donn sipor bann travayer ti Prezidan James Michel, Vis-Prezidan Danny Faure, Minis pour Lanplwa ek Devlopman Resours Imen Idith Alexander; Minis pour Lapes ek Lagrikiltir Wallace Cosgrow e sekreter prensipal pour Lanplwa ek Devlopman Resours Imen Veronique Bresson parmi plizyer lezot zofisye gouvernman ek manm Lasanble Nasyonal.

Dan son lomeli Per De Comarmond ti demann bann fidel pour reflesir lo en keksoz ki byen e nob dan lavi zonm e sa se travay.

I ti met lanfaz lo teks Sen Pol ki dir evit asosye zot avek bann frer pares, ki pa pe travay. « En dimoun ki pa pe travay pa devret manze,» sa teks i dir.
Per De Commarmond ti met lanfaz lo lenportans travay e i ti fer resorti ki tou travay san leksepsyon i nob e enportan.

 « Tou travay i nob e annan son valer. Lekel fanmir ki pa apresye bann fri, legim ek gro manze ki ganny prodwi par fermye, lekel fanmir ki pa apresye en bon bouyon pwason ouswa en pwason griye ki sorti kot bann peser, lekel fanmir ki pa apresye bann servis ki bann dokter ek ners i donn nou e sa zot fer li avek lanmour dan zot leker. Lekel parmi nou ki pa apresye lafason ki bann edikater pe edik nou bann zanfan ? » Per De Commarmond ti demande.

I ti felisit bann etidyan ki fek graduate semenn pase e i ti demann zot pour aprezan met sa ki zot in aprann an pratik pour lekonomi nou pei e pour siport zot fanmir.

Per De Commarmond ti eksprim regre ki dan nou sosyete i annan dimoun ki pa oule travay.
«I malere pour vwar zenn Seselwa ki pa oule travay. Zonm i devret transpire pour ganny son dipen vi ki Zezi kri limenm ti egzers sa metye sarpantye,» Per De Commarmond ti dir.

Dan son lomeli pandan lanmes Grand Anse Praslin Monsennyer Wiehe ti remersye tou dimoun ki pe travay pour ganny zot dipen, nouri zot fanmir dan en fason nob e osi kontribye dan devlopman zot pei e i ti annan mo lankourazman pour zot.

«Travay i donn valer nou lavi konman bann et imen,» Monsennyer ti dir.
Monsennyer ti osi annan mo lankourazman ek sipor pour bann travayer etranze ki travay dan nou pei e i ti demann tou Seselwa pour aksepte zot e donn zot sipor vi ki zot in kit zot fanmir e voyaz sitan lwen pour vin rod en meyer lavi.

«Legliz i toultan la pour donn zot sipor dan nenport fason ki i kapab,» Monsennyer Wiehe ti dir.

Zedi, lavey Lafet Travayer, ti osi annan en gran lanmes spesyal Katedral Imakile Konsepsyon anvil pandan ler dezennen. I ti’n organize par bann travayer Minister Zafer Enteryer ek zot koleg sorti Minister Lanplwa ek Devlopman Resours Imen e osi Federasyon Linyon Travayer.

Sa lanmes ti prezide par Per David Alcindor ki ti ganny asiste par Reveran Brian Volcère ki osi en travayer kot prizon - en departman ki tonm anba Minister Zafer Enteryer.

Plizyer travayer bann diferan departman ki tonb anba portfolio Minister Zafer Enteryer, depi departman prizon, departman lapolis, departman imigrasyon ek leta sivil, Reflecs 3, ti  osi partisip aktivman ansanm pour anim sa lanmes.

Bokou dimoun ki travay anvil ek son zalantour osi byen ki en gran kantite fidel ti profite pour asiste sa selebrasyon ki ti tre vivan.
Apre lanmes, Per Alcindor ti beni bann transpor nef, parey bis pour departman imigrasyon ek transpor bann zofisye servis tenny dife.