Lalyans Seselwa i prezant son komite egzekitif e anons son progranm |09 May 2015
Lalyans Seselwa, en nouvo parti politik ki fek anrezistre yer bomaten, ti dan en premye rankont avek bann reprezantan lapres lokal yer apremidi prezant komite egzekitif sa parti osi byen ki son manifesto dan ki i annan son progranm travay koman en parti.
Dirizan sa parti i ansyen Minis Zafer Etranzer Msye Patrick Pillay, son sekreter zeneral i Msye Ahmed Afif e bann lezot manm i Noelie Alexander ki responsab kominikasyon, William Herminie ki responsab mobilizasyon, Dokter Ramados ki trezorye ek Simone de Commarmond ki en manm ordiner.
Me akoz Lalyans Seselwa?
Msye Pillay ti dir ki akoz konman en parti zot anvi annan en linyon avek tou Seselwa – tou dimoun ki konsider zot konman Seselwa ki annan en leker pour Sesel e pour Seselwa, Lalyans Seselwa konman sa parti pou la pour gid e avans sa pei devan pour ki nou vin en nasyon fyer, modern e demokratik.
Moto sa parti se lazistis, dignite, linite ek lape.
Dan son manifesto sa parti i koz lo son bann valer prensipal, bann domenn dan gouvernman ki i krwar zot devret met lanfaz lo la e sa i enkli lalit kont koripsyon, lord ek lape, servis piblik, zidisyer pour nonm enn de.
Lo size koripsyon ki ti lev bokou deba parmi lapres vi ki ti annan alegasyon koripsyon kont serten manm sa parti, Msye Pillay ti dir ki son parti pou met tou bann striktir neseser anplas pour asire ki lalwa i fer son travay san okenn enterferans politik. I dir i krwar dan donn dimoun en dezyenm sans.
Msye Pillay in fer kler ki Lalyans Seselwa pou lemoman pa fer lalyans avek okenn parti dan lopozisyon me i pou debout litousel dan eleksyon lezislativ ek prezidansyel akoz i la pour donn Seselwa en lot swa.
Msye Pillay i dir ki zot pa konn zot lafors me zot konfidan ki zot pou ganny eleksyon. I ti osi azoute ki i annan sipor plizyer dimoun dan gouvernman aktyel me ki pour lemoman zot pa pe vin devan akoz zot pozisyon.
I ti osi azoute ki sa parti i enn ki pe vin travay pour tou Seselwa e zot pa pe vin fer en politik maltret personn.
Msye Pillay ti anonse ki son parti pou lanse dan milye mwan Zen kot tou Seselwa pou ganny envite e zot pou fer en konvansyon kot tou bann reprezantan distrik pou ganny elekte e ki sa parti pe osi travay lo en lalis reprezantan bann zenn pour sak distrik.
Msye Pillay i dir sa parti in pare pour eleksyon.
Me konman bann ansyen minis dan gouvernan Parti Lepep e oparavan SPPF zot ti defann bann prensip sa parti e aprezan zot pe al debout kont sa menm parti, Msye Pillay i dir ki zot ankor krwar dan sa bann prensip ki zot ti defann e zot fyer ki zot in kapab travay pour ede anmenn sa bann prensip devan tel parey lazistis sosyal e osi en lidantite ki fer Seselwa fyer.
«Me nou santi ki o firamezir pandan bann lannen nou’n perdi direksyon e derey enpe e sa bann valer ki nou ti pe travay dir pour defann e anmenn devan in ganny pil lo la e sa parti pou anmenn pei dan en nouvo direksyon e donn li en nouvo souf ,» Msye Pillay ti dir.
I ti donn konman legzanp nesesite pour annan rekonsilyasyon ek linite akoz i dir ki bokou politisyen zot koz lo linite me napa aksyon konkret pour anmenn dimoun ansanm e nou krwar ki konmela nou pli divize ki ler nou ti komanse e i annan nesesite pour anmenn rekonsilyasyon atraver serten aksyon ki zot pe propoze dan zot manifesto parey en komisyon rekonsilyasyon.
Msye Pillay i azoute ki son parti i krwar ki i annan serten dekalaz dan sa bann valer ki zot in travay dir pour etabli.
Me akoz ki letan zot ti dan gouvernman zot pa ti met tou bann keksoz ki zot ti vwar i mal devan e dir lepep Seselwa ?
Msye Pillay i dir ki koman en ansyen minis ki’n ansarz 5 minister pandan plis ki 15-an i ti dir ki ti son devwar koman en minis ki ti’n sermante pour reste lwayal me i ti toultan fer konnen son pozisyon lo diferan laspe.
«Tou dimoun ki’n travay avek mwan dan bann minister e dan konsey minis zot konnen ki zanmen mon’n per pour dir sa ki mal ler i fodre. An 2009, ler mon ti vwar ki mon pa pou kapab fer gran keksoz, e keksoz ti pe al andeor kontrol mon ti dir mersi e mon ti ale. I ti dir i pa korek pour dir ki bann minis pa dir sa ki zot vwar i mal akoz zot dir e zot toultan dir.
«Me la nou’n vwar ki pour sanz tou sa bann keksoz ki nou vwar i mal i enportan pour annan en lot parti avek en progranm pour nou koriz tou sa bann fot,» Msye Pillay ti dir.
