Dimoun i montre solidarite anver lafanmir |23 May 2015

En bon nonm dimoun ti ralye wikenn pase pour partisip dan bann aktivite ki plizyer mouvman dan dyosez Katolik ki travay avek bann fanmir ti’n organize pour koensid avek Lazournen Lafanmir le 15 Me.

Sef egzekitif Lasosyasyon Pour Promosyon Fanmir Solid (APSHF), Madanm Rosie Denis, ki  ti osi enn bann kordinatris sa bann aktivite, i dir ki malgre enpe lapli plizyer dimoun ti pran par dan lamars avek labouzi ki ti konmans kot Legliz Bon Paster Mont Fleuri e al fini kot Katedral Imakile Konsepsyon kot laba  ti annan en lapriyer pour bann fanmir e osi praise and worship ki ti fini byen tar dan lannwit.

«Pour premye fwa ki nou organiz sa aktivite partisipasyon pa ti mal ditou e dimoun ki ti’n reponn lapel ti montre zot solidarite anver promosyon bann bon valer lafanmir,» Madanm  Denis ti dir.

I ti azoute ki plizyer dimoun ki pa ti pran par dan lamars ti prefere esper kot katedral  kot zot ti partisip plennman dan selebrasyon.

En lanmes pour lafanmir son Dimans kot legliz Grand Anse ti osi byen ganny asiste.

«Lefe ki dimoun ti fer sa deplasman an gran kantite i osi montre ki zot konsernen avek sitiasyon nou bann fanmir,» Madanm Denis ti azoute.

I ti dir ki sa bann mouvman dan dyosez pe mazin fer en lot aktivite pour bann fanmir ver lafen lannen.