Follow us on:

Facebook Twitter LinkedIn YouTube

Archive -Seychelles

Madanm Eugenia Songol i fet 102-an |27 May 2015

 

 

 

Sanson ‘Zwayez aniverser’ ti rezonnen yer apremidi dan restoran OLE!! Anse Royale ler Madanm Eugenia Songol ti koup son gato dan en pti resepsyon alokazyon son lanniverser 102-an.

Tou ti konmans avek en romans ‘Je suis à ta puissance’ sante par group trwazyenm-az distrik Anse Royale ki ti’n organiz sa pti resepsyon ansanm avek ladministrater distrik ek manm  lafanmir.
Madanm Eugenia Songol, ki ti ne le 26 Me, 1913, i reste anler Mont Plaisir avek son garson Paul Julius ki annan 82-an. Son msye ek son lot garson in mor.

Dapre son carer Fatima Kilindo, Madanm Songol i ankor byen for malgre ki son latet i ale par ler, me i konpran ler ou koz avek li e i reponn ou tre byen. I manz tou keksoz, bwar tou keksoz, menm en pti labwason for dan rar ler ou donn li. I napa douler okenn par eksepte dan son lipye kot i bezwen led ler pour li deplase.

Kot sa pti resepsyon, asize obor son garson ek lezot dimoun, i demande: “Akoz sa kantite dimoun?”. Son carer ki ti lanmenm obor ti dir li ki zot la pour son lanniverser.
Zournal Seychelles NATION ti profite pour demann li si i kontan ki i’n ariv sa laz.

“Mon remersye Bondye. Li ki fer tou. Mon kontan. Zis Bondye ki konnen. I rar pour dimoun ariv sa laz. Ni mon manman, ni mon granmanman pa’n ariv sa laz,” i ti dir.
I ti kontinyen an riyan: “Me mon ti a pli kontan si mon laz ti ava en pti pe pli ba, koumsa mon ti ava en pe pli for.”

Avan sa resepsyon Madanm Songol ti ganny benediksyon par per Patrice Alemanana sorti dan parwas Anse Boileau e plitar administrater distrik Anse Royale Jimroy Jeannevole ti prezant Madanm Songol avek en pannyen gadyak sorti kot Prezidan James Michel. I ti osi ganny lezot kado sorti kot lezot individi ek biznes.

Sa pti resepsyon kot restoran Ole!! ki ti konmans ver 2er apremidi ti ganny animen par trwazyenm-az sa distrik ek group duo ‘Spices’ ziska ver 4er apremidi.

 

 

 

» Back to Archive