Lansman ofisyel parti Lalyans Seselwa |30 May 2015

‘Ler in arive pour nou debout for pour nou drwa,’ Msye Pillay i dir

«Ler in arive pour nou debout for pour nou drwa, nou laliberte lekspresyon, pour lazistis, pour dir non avek sa diskriminasyon ki bokou nou frer ek ser in sibir pandan plis ki sa trant dernyen lannen.»

Se lider parti Lalyans Seselwa, Patrick Pillay, ki ti dir sa dan son diskour pour ofisyelman lans sa parti yer swar dan Sant Konferans Enternasyonal.
Sekreter zeneral parti Ahmed Afif, trezorye Dokter V. Ramados ensi ki lezot manm – Noellie Alexander (responsab kominikasyon), William Herminie (responsab mobilizasyon), Simone de Commarmond, Joanna Nicette, Vivienne Soundy, Clifford André, Rosie Bistoquet ek Terrence Mondon – ti zwenn avek bann siporter pour sa ki zot in dekri konman en zour istorik.

«Ler in arive pour nou dir avek sa gouvernman ki nou nepli per, nou pa pou les zot pil lo nou drwa imen, nou pa pou les zot anbet nou. Ler in arive pour nou dir byen for nou Seselwa nou pou pran nou desten dan nou prop lanmen e nou pou debout nou latet o e byen fyer pour nou dir ‘debout Seselwa mon lib’», Msye Pillay ti dir avan azoute ki «zanmen nou’n ganny en pli bon moman pour nou kriy for ki ler in arive pour nou sanz sa gouvernman e ranplas li avek enn ki met Seselwa ek Sesel premye».

Msye Pillay ti osi dir ki ler in arive pour nou vin ansanm konman en nasyon, les nou lafreyer deryer nou, fer nou rev vin en realite, pran nou lafors dan nou de lanmen e mazin lavenir nou pei e nou zanfan konman nou priorite.

«Pa asize pour zis plenny nou fristrasyon avek nou kanmarad, pa asize pour nou soufer dan silans kan nou konnen klerman ki lakoz nou fristrasyon e lakoz nou lafreyer pa’n zanmen enterese avek nou Seselwa… Pour konbyen tan ou pou asize lebra krwaze e regarde trankil letan sa zoli bizou ki apel Sesel pe ganny vyole par en pti group dimoun ki egois e malonnet ?» Msye Pillay ti dir.

I ti osi koz lo sekirite dan pei, lalit kont drog, akse avek lans, drwa bann travayer, akse lo nou bann zil, en pansyon konvenab pour bann dimoun aze, prodiktivite ki tre ba, koripsyon,  eksetera.
Lider parti Lalyans Seselwa in osi dir: «Annou dir zanmen ankor nou pou les en zonm annan pouvwar absoli akoz pouvwar absoli i koronpi.»

I ti menm fer referans avek Aung San Suu Kyi, ki in dekri konman en fanm tre for dan lemonn e ki osi lider lopozisyon La Birmani, ki ler i ti resevwar pri Nobel i ti dir: «Pa pouvwar ki kree koripsyon, me plito lafreyer – lafreyer perdi pouvwar par bann ki tenir pouvwar dan zot lanmen e pa oule large.»
Msye Pillay ti demann son bann siporter pour etidye bann alternativ ki pe ganny ofer.

«En nouvo loportinite pe ganny ofer par en group dimoun ki sorti dan diferan profesyon e dan diferan landrwa travay. Serten nou in deservi konman minis dan gouvernman dizour, serten nou in servi konman MNA dan lasanble pour reprezant gouverman dizour. Nou pa onte pour bann lannen ki nou’n servi gouvernman. Byen o kontrer. Nou napa nanryen pour kasyet. Ansanm avek en bon group dimoun – politisyen, teknokrat dan servis piblik, travayer sekter prive e dan bann lorganizasyon non-gouvernmantal, kantite endividi parey zot ki la tanto – nou tou nou’n travay dir pour anmenn sa nasyon kot i ete ozordi. Ozordi serten nou in ganny tit tret. Mon bann zanmi, nou ti pou en vre tret pour nou krwayans, nou pei, nou fanmir ek tou nou pep si nou pa ti’n sorti, debout, avans devan e dir for ‘Msye, la nou’n ganny ase – ou avek ou gouvernman pe al tro lwen. Nou aprezan nou pe dir ou Msye i tro tar pour fer nou dormi boner,» Msye Pillay ti azoute.
Msye Pillay in osi challenge Prezidan James Michel pour en deba lo televizyon SBC.
Sekreter parti Ahmed Afif ti lo son kote pas an bref lo bann pwen enportan ki trouve dan konstitisyon sa parti.