Kominike Lapolis |27 June 2015

Lapolis in raporte ki trwa parmi sa kat akize ki ti reste lo rimann an koneksyon avek lensidan dan kordgard Anse Boileau de wikenn pase in reganny rimann ziska ler zot zafer i ganny ekoute, tandis ki en lot in ozordi ganny large lo menm kondisyon ki sa enn ki ti ganny large Lendi sa semenn.

Sa i vedir ki sa dezyenm parmi sa senk akize in li osi siny en serten sonm larzan  konman kosyon, i bezwen remet son bann dokiman voyaz avek lotorite, i bezwen aparet  ankour sak fwa zafer i pase e i  pa ganny drwa konmet okenn tel lofans pandan son liberte provizwar.

Sa bann akize, ki ti ganny sarze devan Lakour Siprenm Lendi sa semenn, ti repas ankour Zedi kot avoka ki pe defann zot ti soumet en laplikasyon pour zot ganny large lo ‘bail’. Ziz ki lo sa ka ti demande ki zot retourn ankour yer kot i’n finalman pran desizyon pour kit sa trwa akize anndan par lefe ki i annan plis levidans kont zot e osi prenan kont ki sa bann tel lofans in ganny konmet dan en kordgard.

Prosen dat ki sa senk akize pou aprezan repas ankour i le 3 Zilyet.

**********

Lapolis in egalman raporte ki sa trwazyenm sispe ki zot ti pe rode an koneksyon avek bato Madras ki ti brile Anse Boileau mwan pase ti ganny atrape dan distrik Au Cap Zedi swar. Sa zonm 28-an in ganny anmenn ankour e ganny rimann ziska le 3 Zilyet.