Follow us on:

Facebook Twitter LinkedIn YouTube

Archive -Seychelles

Lentansyon gouvernman pour pey 13enm mwan : |27 June 2015

 

 

 

Travayer Minister Finans pa responsab pour devwal lenformasyon

Napa okenn travayer Minister Finans, Komers ek Lekonomi Ble ki responsab pour devwal lenformasyon konsernan lentansyon gouvernman pour pey en trezyenm mwan, ouswa en bonous ki vo en mwan saler tou le lafen lannen.

Se minis responsab pour sa minister Msye Jean-Paul Adam ki ti fer sa deklarasyon letan i ti rankontre lapres yer apremidi.

Nou a rapel ki sa lenformasyon ti’n sirkil dan serten lapres en pe letan pase e swivan sa, departman finans ti’n dir ki i pou ouver en lanket pour vwar si okenn son travayer i responsab pour devwal sa lenformasyon avan ler.

Minis Adam in dir ki apre sa lanket, son minister i satisfe ki okenn son travayer pa responsab pour devwal sa lenformasyon. An konsekans, i ti azoute, napa okenn travayer ki riske ganny okenn sanksyon an rezilta sirkilasyon sa lenformasyon ki ti sipoze ankor konfidansyel dan lapres.

«Lanket in fini en nou’n kapab idantifye koman lenformasyon in sorti. Mon kontan pour dir ki napa okenn staf ki’n annan lentansyon pour fer lenformasyon sorti dan Minister Finans,» Minis Adam in dir.
Sepandan, minis in rekonnet ki sa lenformasyon in ariv dan domenn piblik avan ler an rezilta serten febles ki son minister in idantifye dan son fonksyonnman. Kanmenm, i pa’n oule devwal sa bann febles akoz in dir ki i pa oule met okenn son anplwaye dan en pozisyon difisil.

 «Nou’n idantifye serten febles e mezir apropriye in ganny met anplas pour anpes sa ariv ankor,» Msye Adam in azoute.

I’n plito felisit bann travayer Minister Finans pour zot profesyonalizm fas a sa sitiasyon e pour fer zot travay parey i fodre.

Dan son rankont avek lapres yer, Minis Adam ti osi klarifye en lot spekilasyon ki pe sirkile dan serten medya konmkwa 50 milyon dolar ti perdi dan Labank Santral an 2003. Minis responsab pour finans in dir ki son minister i ouver pour koz lo nenport ki size ki konsern li, e ki si i annan okenn lenformasyon lo la, i pou sirkil avek piblik. Se dan sa konteks ki in demann avek Gouverner Labank Santral, Manmzel Caroline Abel, pou kolekte otan lenformasyon ki i kapab lo sa size.

«Nou politik i tre for dan Minister Finans pour nou devwal okenn lenformasyon ki nou annan,» Minis Adam in asire.

In sepandan deplor karakter agresif sa spekilasyon e lefe ki in direkteman atak serten dimoun, parey Vis-Prezidan Danny Faure, avek bi pou fer mank konfyans dan gouvernman.

«Mon note ki sa alegasyon in ganny fer avek en lamertim kont serten dimoun, sirtou Vis-Prezidan Danny Faure ki pa ti ni Minis Finans sa letan. Sa i regretab e i montre ki i baze lo en zefor pour kre en santiman mank konfyans dan gouvernman,» Minis Adam in dir.


 

 

 

» Back to Archive