Gouvernman pou byento demann Lasanble en bidze siplemanter |30 June 2015

Gouvernman pou byento anmenn en propozisyon devan Lasanble Nasyonal ki pou demann en bidze siplemanter pour lannen 2015.

Se Minis pour Finans, Komers ek Lekonomi Ble Msye Jean-Paul Adam ki ti fer sa lanons pandan en rankont avek lapres Vandredi apremidi.

Menm si i pa’n donn sif ki gouvernman pou demande, Minis Adam in zistifye sa bezwen bidze siplemanter par lefe ki i neseser ki gouvernman i mentenir krwasans ekonomik e fer serten depans an plis baze lo serten sitiasyon ki i pa ti’n kapab prevwar.

Parmi lezot bezwen, sa i enkli nesesite pour lit kont sa lespes seniy plim ki’n anvair nou e ki minis responsab pour finans i dir i en menas pour nou lekonomi.

In azoute ki ziska prezan, larzan pour konbat seniy plim in sorti dan bann fon sipor oubyen ‘support funds’ an Angle.

Lo kestyon ki si i pa kont polisi gouvernman e kont rekonmandasyon IMF (Fon Moneter Enternasyonal) pour Minister Finans demann bidze siplemanter, Minis Adam in dir ki i difisil pour mentenir en bidze pour en an, e ki si i annan defo, i enportan ki sa i ganny aziste. In azoute ki sa demars in ganny rekonnet par IMF.

«I pa zis en kestyon demann plis larzan me nou bezwen aziste nou avek larealite,» Minis Adam in konklir.

An se ki konsern eleksyon prezidansyel ek lezislatif ki normalman i sipoze fer boner lannen prosenn, Minis Adam in dir ki depans pour sa de eleksyon in ganny bidzete dan bidze pour 2016. Sepandan, in azoute ki si an ka eleksyon i fer sa lannen, son minister pou bezwen demann Lasanble Nasyonal pour aprouv en lot bidze siplemanter.