Follow us on:

Facebook Twitter LinkedIn YouTube

Archive -News

Kominike lapolis |30 June 2015

Lapolis in raporte ki 2 zabitan Takamaka – Alex Laurence, en papa 32-an, ek son garson Ron Laurence, 11-an, – i viktim sa lensidan trazik raporte arive Grand Police Dimans apremidi.

Dapre rapor  Alex e plizyer manm son fanmir, akonpanyen par  en lot fanmir ti pe pas letan lo lans Grand Police letan tou ti al mal zis 2 a 3 met avek lans.

Sa ki ti la i rakonte  ki  Ron ti pe asize lo en ros letan i ti glise tonm dan lanmer e deswit i ti trouv li dan difikilte e la son papa ti entervenir pour esey sekour li me li osi  i ti rankontre menm problenm.  Trwa lezot zonm dan group ti esey zot mye pour sov Alex ek son garson me i paret ki ti annan en kouran tro for dan sa landwra e zot lesey ti anven.

Avek lasistans Gard Lakot Sesel ek younit marin lapolis lekor Ron ti ganny  ranmase ver 4er30 e pour son papa Alex ti ganny rekipere dan lanmer ver 6er25.

****

En zonm 24-an ki reste Pointe Larue i admit dan younit swen entansif Lopital Sesel swivan blesir dan kote gos son ledo. Sa lensidan ti raporte Dimans ver minwi dan zanmerant Palais des Sport. Kondisyon sa zonm in ganny dekri konman stab.

Lapolis in aret en group zenn garson swivan lanket ki zot pe fer dan sa ka.

****

En zonm 36-an sorti Anse Aux Pins ki i osi admit dan younit swen entansif Lopital Sesel swivan en aksidan raporte arive ver 4er58 Dimans granmaten dan distriK Pointe Larue.

Dapre rapor sa zonm, drayver en loto ki ti pe fer direksyon Anse Aux Pins, ti perdi kontrol son transpor e fer kolizyon avek en lot transpor pour en lazans vwayaz ki ti pe desann direksyon lavil. Sa aksidan ti ariv Anse Des Genets.

 

****

 

En garson 16-an ki reste Labatie i admit dan younit swen entansif Lopital Sesel apre ki i ti ganny tape par en pick-up dan zanmerant lotel Fisherman’s  Cove, Bel Ombre Sanmdi granmaten. Kondisyon sa garson in ganny dekri konman stab. Sa lensidan ti ganny raporte konman en ‘hit and run’ akoz sa pick-up ki ti’n tap sa garson ti’n kontinyen avek sa larout.

Swivan lanket e lenformasyon resevwar par lapolis sa pick-up ti plitar ganny trouve kot La Faya e en zonm 24-an ki reste Beau Vallon in ganny arete. Tes lalkol fer lo sa zonm o moman son larestasyon ti parlao limit preskri par lalwa.

Sa lensidan ti ganny raporte avek lapolis ver minwi edmi e sa sispe ti ganny arete ver 1er40 bomaten. Lapolis pe fer lanket dan sa ka.

****

Lapolis in osi raporte ki sa zonm 35-an, drayver  bis SPTC enplike dan sa aksidan fatal kot en pti garson 10-an ti perdi son lavi La Gogue Zedi apremidi, ti pas ankour Vandredi e in ganny large  lo serten kondisyon antretan ki lapolis i kontinyen avek zot lanket. Sa sispe pou repas ankour le 1 Zilyet.

Swivan sa 2 dernyen lensidan larout pli serye raporte tou dernyenman, ankor  enn fwa lapolis pe demann  motoris konman pyeton pour pran prekosyon ekstra letan zot pe deservi larout piblik sirtou la pandan letan lapli.

 

 

 

 

 

 

 

 

 

 

» Back to Archive