Follow us on:

Facebook Twitter LinkedIn YouTube

Archive -Politics

Mesaz Lider Lopozisyon dan Lasanble Nasyonal alokazyon Lazournen Nasyonal le 29 Zen, 2015 |30 June 2015

‘Nou bezwen kontinyen nou resers ver en demokrasi konplet’

 

“Nou bezwen kontinyen nou resers ver en demokrasi konplet kot sak Seselwa i trouv son vre plas dan sosyete,” Lider Lopozisyon dan Lasanble Nasyonal David Pierre in dir.

Msye Pierre in fer sa deklarasyon dan son mesaz alokazyon Lazournen Nasyonal yer.

Teks entegral mesaz Msye Pierre i lir koumsa:

“Le 29 Zen 2015 i mark nou premye Lazournen Nasyonal ki koensid ek nou 39enm lanniverser nou Lendepandans. I en lokazyon spesyal akoz i fer nou realize ki konman en nasyon nou pe vin pli matir dan nou demokrasi e sa pe permet nou redonn bann diferan moman dan nou listwar zot vre plas e zot vre lenportans, tel parey nou pe donn sa dat le 29 Zen.

“Le 29 Zen 1976 i reprezant sa dat kot Sesel ti ganny son Lendepandans, kot nou ti vin en repiblik, en nasyon souveren. 39-an plitar, dan mon refleksyon, mon realize ki malgre ki nou’n fer plizyer pa ver en demokrasi modern i reste nou plizyer gran defi ki nou bezwen adrese konman en nasyon.

“Nou bezwen kontinyen nou resers ver en demokrasi konplet kot sak Seselwa i trouv son vre plas dan sosyete. Kot vre loportinite i ganny donnen a sak Seselwa pour li akonplir son rev personnel, pour li kapab zwenn son potansyel endividyel e fer sa meyer kontribisyon ver devlopman ekonomik son pei e ver lepanouisman son fanmiy.

“Nou bezwen kontinyen travay pour garanti ki drwa endividyel sak Seselwa i ganny respekte dan son totalite san pran kont son ras, sex, relizyon, e lapartenans politik, konsistan ek lespri nou konstitisyon.

“Ozordi, sa pep i devret ganny enspire pour li kontinyen ver resers pour pli gran demokrasi pour nou pti pei dan en fason sivilize lo sa nivo kot tou Seselwa i a kapab santi li lib pour eksprim li san lafreyer. Lefe ki le 29 Zen 2015 in ganny deklare konman nou lazournen Nasyonal pour la premyer fwa i devret fer nou konpran ki sa ki nou anvi konman en pep i kapab ganny realize si nou kontinyen pouse e si nou annan sa volonte pour akonplir li, donk sa levennman i devret osi enspir nou pour nou kapab travay pour fer fas ek bann gran defi ki Sesel pe fer fas avek.

Alor, dan mon refleksyon, konman Lider Lopozisyon mon mazin bann defi ki Sesel i devret tret konman en priyorite dan nou resers pour solisyon pour nou bann problenm.

“E la an premye lye, mon mazin sa fleo drog ki pe kontinyen ravaz nou sosyete. Mon partikilyerman mazin nou bann zenn fiy ek garson ki nou’n perdi atraver labi drog. Bann ki pe angaz zot dan bann aktivite anti sosyal ki anretour i annan bann gran gran lenpakt lo lafanmiy e lo sosyete an zeneral, tel ki krim, vol ek vyolans e protitisyon. Les sa lazournen enspir nou pour nou trouv bann solisyon dirab pour sa bann problenm.

“Mon egalman mazin sa gran defi koudlavi ki kontinyelman vin pli ser e ki ogmant la kantite dimoun ki viv dan lapovrete dan nou pti pei. Les sa levennman ki nou pe selebre ozordi enspir nou pour nou trouv en solisyon dirab pour sa problenm.

“Ser, frer Seselwa, les sa lazournen osi enspir nou pour nou vin bann sitwayen ki debout akote bann gran prensip travay dir, etik e profesyonalizm dan travay ki anretour i a enspir gouvernman pour li vin ek en formil ki a garanti bann benefis ki pli zis e pli egal pour tou bann travayer Seselwa.

“Dan sa moman refleksyon mon osi vir mon panse ver bann dimoun ki’n pran zot retret. San dout, se bann dimoun ki’n travay dir e kontribye pour fer Sesel sa ki i ete ozordi e donk mon tya kontan ki sa lazournen i enspir gouvernman pour revwar sa kalite benefis ki nou bann retrete/pansyoner i gannyen e elev li lo sa nivo ki pou permet zot soulaz bann difikilte lavi ki zot osi zot pe fer fas avek.

“Me, egalman, pandan ki tou Seselwa pe selebre nou devret met en moman dekote pour nou fer en refleksyon profon lo ki kalite kontribisyon pozitiv ki nou kapab endividyelman fer pour akonplir sa rev pour nou nasyon.

“Sa rev pour nou pei vin enn ki pli demokratik e pli solid ekonomikman kot tou Seselwa i a kapab libreman fer son kontribisyon e kot anretour i a ganny sa kalite reminerasyon ki a permet li ek son fanmiy viv dan dignite.  

“Mon swet tou Seselwa bonn santé e bonn fet Nasyonal. Ki Bondye i kontinyen beni nou zoli pei Sesel.

“Mersi.”    

 

 

 

 

 

 

 

» Back to Archive