Parad i mark Lazournen Nasyonal |30 June 2015

Lafet Nasyonal ki ti selebre alokazyon 39enm lanniverser nou lendepandans yer, ti marke par en gran parad militer lo Stad Linite.

Moman pli for sa parad ti diskour prononse par Prezidan Larepiblik Msye James Michel, dan prezans Prezidan Larepiblik Palau Msye Tommy Remengesau, ki ti envite doner kot selebrasyon nou Lafet Nasyonal.

Osi prezan ti ansyen Prezidan James Mancham, Vis-Prezidan Danny Faure, Spiker Lasanble Nasyonal Onorab Patrick Herminie, Prezidan Lakour Dapel Ziz Francis MacGregor, Sef Ziz par enterim Durai Karunakaran, bann minis, sef lopozisyon dan Lasanble Nasyonal Onorab David Pierre, manm kor diplomatik ek lezot envite.

Parad, ki ti dirize par Mazor Vincent Luther, ti enkli en defile par bann diferan younit Lafors Defans Pep sesel (SPDF), en platoun lapolis regilye, en platoun Servis Tenny Dife ek Sovtaz a kote lafors lapolis Moris, Larme Ostralyen, Endyen, Franse e diferan groupman zenn.

Ti osi annan en demonstrasyon par kat parasitis Lenfantri Marin Franse ki form parti ‘Forces Armées de la Zone Sud de l’Océan Indien’ (FAZOI) ki baze St. Pierre, Larenyon. Zot ti desann avek paviyon Sesel, Palau ek Lafrans. Bann solda Endyen ti osi aport en latous spektakiler avek en demonstrasyon lo moter.

Apard ki Prezidan Larepiblik ti enspekte en gard doner, nouvote sa lannen ti Lim Nasyonal ki ti enterprete par Danielle Denis pandan ki en group solda ti fer monte paviyon pei. En group mizisyen Lamarin Endyen ti’n zwenn avek bann manm Lorkes Nasyonal.

Ti osi annan benediksyon e lektir par bann diferan larelizyon ki form par Konsey Enterelizye Sesel (SIFCO).

Parad ti swiv par en spektak kiltirel avek diferan artis Seselwa tel ki Jany, John Wirtz, Patrick Victor ensi ki bann gannyan konpetisyon sanson pour Lazournen Nasyonal. Me pandan parad limenm, sa gran nonm manm piblik ki ti’n ranpli Stad Linite ti ganny en avan gou nou larises artistik atraver en poenm resite par poet Stephanie Joubert, ki ti ne zour nou lendepandans, le 29 Zen 1976. En group 500 zenn ti osi partisip dan en gran spektak ki ti’n met an senn par Manmzel Valerie Jumeau.

Bann portre ki akonpanny lartik i montre serten bann moman for sa levennman yer.