Diskour Prezidan James Michel alokazyon Lazournen Nasyonal |30 June 2015

En 13enm mwan saler pour tou anplwaye sekter piblik

• Pansyon sekirite sosyal pou ogmante par 500 roupi

Konmansman Zanvye 2016 tou anplwaye sekter piblik ki pa lo en kontra fixed-term pou ganny en 13enm mwan saler, baze sirtou lo zot performans, Prezidan James Michel in dir.

In osi azoute ki an Desanm sa lannen, pansyon sekirite sosyal pou ogmante par 500 roupi. Sa ogmantasyon 500 roupi i ava osi aplikab pour bann dimoun ki pe tous pansyon gouvernman.

Prezidan ti fer sa bann lanons yer swar dan son diskour alokazyon Lazournen Nasyonal selebre pour premye fwa le 29 Zen, zour nou Lendepandans.

Prezidan Michel ti dir ki gouvernman Sesel i krwar dan linisyativ tou son sitwayen e i pou toultan met anplas bann mezir pour ogmant prodiktivite e amelyor service delivery eki sa i bezwen ganny akonpannyen par serten incentives.

«Nou krwar dan rekonpans travay dir, prodiktivite ek inovasyon. Anprenan sa an konsiderasyon, konmansman Zanvye 2016 tou anplwaye sekter piblik ki pa lo en kontra fixed-term pou ganny en 13enm mwan saler, baze sirtou lo zot performans. Sa mezir osi pa pou aplik pour bann dimoun ki okip pos preskri par Konstitisyon. I annan deza en gran nonm konpannyen prive ki pe ofer sa kalite incentives pour rekonpans zot travayer pour zot bon performans. Nou pou kontinyen ankouraz lezot fer parey, toutan minimizan lenpak lo bann pti biznes ek bann lantrepriz mwayen,» Prezidan Michel ti dir.

Prezidan ti azoute ki dignite, konfor ek sipor nou dimoun aze, bann ki pa kapab travay e bann ki pli vilnerab dan nou sosyete in touzour en konsern son gouvernman.

Se pour sa rezon ki an Desanm sa lannen, pansyon sekirite sosyal pou ogmante par 500 roupi. Sa ogmantasyon 500 roupi i ava osi aplikab pour bann dimoun ki pe tous pansyon gouvernman. «Sa i demontre nou langazman ferm pour kontinyen amelyor standar lavi nou bann dimoun ki’n devoue zot o-servis nou pep. Nou pa pou zanmen oubliy nou dimoun aze, ni nou bann dimoun pli vilnerab! Mon sezi sa lokazyon pour mwan salye zefor bokou nou dimoun aze ki’n kontribye pandan plizyer lannen pour fer nou lendepandans en sikse.

«Zot konnen ki mannyer keksoz ti ete sa letan.  E zot vwar ki mannyer keksoz i ete ozordi. I annan parmi sa bann zenerasyon ki’n travay depi avan Lendepandans ki touzour pa’n ganny en pansyon avek gouvernman Britanik sa lepok – tel ki nou bann maren Seselwa ki ti dan Royal Fleet Auxiliary (RFA) e ki ti travay lo tenker ek lezot bato Angle.  Gouvernman i angaz son lekor pour donn zot en sipor finansyel apartir 2016 atraver en peyman ‘ex-gratia’ konman en rekonnesans zot kontribisyon. Nou osi kontinyen siport zot linisyativ pour rod sipor ek konpansasyon avek gouvernman Britanik,» Prezidan Michel ti azoute.

I ti note ki vin en paran se en gran responsabilite ki personn pa kapab delege ni abandonnen e ki son gouvernman i konsyan difikilte sitiasyon bokou bann manman tousel.

Pour ed bann manman tousel entegre dan lasosyete, sirtou atraver en travay prodiktif e remineratif, gouvernman pou donn sipor adisyonnel pour day-care an faver bann manman ki pli vilnerab. Sa bann mezir ki pe pran pou tous tou manman, pa zis bann manman tousel, pourvi ki zot ranpli serten kriter.

«Ankor enn fwa, annou pran nou responsabilite o-serye. Annou travay e kontribye anver nou prop byennet e devlopman nou pei,» Prezidan Michel ti ensiste.

I ti osi dir ki prosperite Sesel i depann sirtou lo nou prodiktivite ek aktivite ekonomik, e ki nou depan konsiderableman lo tourizm ek lapes.

«Zot zener lanplwa, lenvestisman e zot sours prensipal nou lekonomi ek nou resours bidzeter. En lot sekter kle ki mon’n touzour met lanfaz lo la – e mon pou kontinyen fer li – se pti e mwayen lantrepriz. Zot devlopman i en eleman kle stratezi ek plan mon gouvernman pour donn plis loportinite nou zenn e, dan en fason zeneral, empower nou pep. Nou’n deza met anplas bann mezir e nou pou kontinyen met anplas tou mezir ki favoriz en devlopman ek lepanouisman bann pti biznes ek bann lantrepriz mwayen dan en fason armonye e ekitab,» Prezidan Michel ti dir.

I ti azoute ki prenan sa ankont, son gouvernman pe al entrodwir lezislazyon ki ava ogmant sipor pour sa bann pti lantrepriz ek lantrepriz mwayen.

«Sa nouvo lalwa ava permet bann pti biznes avek en reveni mwens ki 250,000 roupi pour senpleman anrezistre zot avek SENPA san tonm anba bann prosedir administratif Seychelles Revenue Commission. Nouvo lalwa i ava osi fer provizyon pour zot ganny plis akse avek kredi e, dan serten ka, sibvansyon pour bann pti biznes ki pe al konmanse e ki pe viz ver inovasyon. Nou pe larg lanmen Seselwa!,» Prezidan Michel in dir.

Msye Michel ti azoute ki anmenmtan, prosedir licensing pou al ganny senplifye ankor. Dapre Prezidan Michel, serten kategori pti lantrepriz pou kapab ganny zot licence dan en lespas zis en semenn e konmans zot loperasyon, pandan ki zot pe met zot an konformite avek regleman leres lotorite konsernen (par egzanp sanniter, lanvironnman).

«Nou pe larg lanmen pti biznes! Sa bann mezir i annan pour bi permet tou Seselwa, ki anvi, konmans zot prop biznes, e kontribye ver prosperite nou pei e byennet nou pep. Zot annan osi pour bi redwir birokrasi e amelyor service delivery – bann size ki mon’n koz bokou lo la, e ki mon pe kontinyen adrese,» Prezidan in dir.

Bann portre ki akonpanny lartik i montre serten moman for selebrasyon Lazournen Nasyonal yer.