Dife i detri en guest house ek en laboutik |01 July 2015

Dife in konpletman detri en guest house senk lasanm La Digue Lendi swar e osi en pti laboutik Takamaka yer granmaten.
Erezman personn pa’n ganny blese dan toulede lensidan.

Dan ka sa dife La Digue Lendi swar kot Villa Hortensia, portparol Servis Tenny Dife ek Sovtaz Msye Jones Madeleine ti dir ki ti anviron 10er40 Lendi swar ki  zot stasyon servis tenny dife La Digue ti ganny alerte ki sa guest house ti anflanm.

Msye Madeleine ti dir ki deswit de kanmiyon ti ganny deplwaye.

Dapre Msye Madeleine, ler zot ti ariv La Passe, sa guest house ti konpletman anflanm e ti pran zot 40 minit pour met sa dife anba kontrol.

Sa lot lensidan dife kot laboutik Kot Rajan Takamaka ti ariv anviron 03er45 yer granmaten.

Ler dife ti deklare ti annan zis en dimoun dan sa laboutik, ki’n detri konpletman.
Msye Madeleine i dir ki pour lemoman lakoz toulede dife pa ankor ganny etabli e lanket pe kontinyen.