En group zenn lo lekspedisyon ‘Gold Award’ Moris |03 July 2015

En group zenn pe kit Sesel ozordi pour Pointe Jerome, Moris kot zot pou partisip dan sa ki apel en ‘Gold Award Expedition’.

Sekreter prensipal pour lazenes Alain Volcère ek Luther Vincent ti prezant tiket avyon avek sa bann zenn akonpannyen par bann dirizan ek ankadrer pour sa vwayaz.
Sa delegasyon 60 dimoun i konpri 49 zenn ek 11 adilt ki pou sirvey zot.

Prezantasyon tiket ti deroul kot sant lazenes English River pandan en pti seremoni e ti form parti lansman ofisyel dernyen letap ki sa bann zenn i devret fransir avan ki zot resevwar zot ‘Gold Award’ ki etabli par fondasyon enternasyonal ‘Duke of Edinburgh’s International Award Programme’ pli byen koni koman President’s Award.

Pandan sa seremoni ti annan bann paran, ansennyan, dirizan progranm e osi bann gannyan presedan ki ti la pour donn sipor sa bann zenn.
Sa bann zenn i ekspekte retourn dan pei Sanmdi le 11 Zilyet.

Pandan sa lavantir Moris, sa bann zenn i ekspekte kouver anviron 30 erdtan apye e pas 3 lannwit deor.
Dapre norm sa fondasyon, sa lekpedisyon i merit ganny fer dan en lanvironnman enkoni e non familye ; e se pour sa rezon ki fer li diferan avek menm parkour ki laplipar sa bann zenn in deza eksperyanse letan zot ti pas atraver letap bronz ek larzan sa progranm.

Msye Volcère ti dir ki menm si konteni sa lekspedisyon i paret ase lour, bann zenn in ganny sifizaman formen pour fer fas avek sa defi.

I ti osi fer remarke ki lazenes i partisip dan progranm Award akoz zot in deside ki en dimansyon disiplin ek responsabilite personnel i esansyel dan demars ver en sitwayennte egzanpler.
En zenn e en paran ti osi dir enn de pti mo remersiman e swet sa bann zenn bonn sans lo zot parkour.