Lazournen Nasyonal selebre le 29 Zen |03 July 2015

Bann souvenir en spektak kiltirel emouvan

Pour premye fwa Lazournen Nasyonal ti ganny selebre le 29 Zen ansanm avek nou lafet Lendepandans e pour komemor sa lazournen ti annan en diversite spektak ki ti deroule kot Stad Linite.

Stephanie Joubert ki ti ne le 29 Zen ti lir son poenm avek tit ‘Mon Salye Ou’ avan ki Prezidan Larepiblik Msye James Michel ti fer son diskour.

Apre ki bann platoun ki ti’n partisip dan defile parad ti’n fini kit stad, ti annan anviron 500 zenn seselwa ti ralye lo laplenn anba nou lesyel tropikal pour en spektak ‘majorette’. Zot ti anmenn nou lo en vwayaz depi lo montanny  kot plen nou fler potao ki andemik i viv e ziska zil Aldabra pour anmenn nou torti zean ki nou lafyerte. Zot ti menm demontre dan fon nou lanmer ki sours nou lekonomi ble e osi bann fler miltikolor ki dan nou zalantour.

Nou tenm nasyonal pour sa lannen ‘Mon kontan sesel’ ti osi ganny reflekte pandan sa  spektak vivan avek kouler ki ti demontre limanite ek lazwa de viv nou bann zenn.

Nou bann kouler nasyonal ti kouronn tou e montre lanmour enfini pour nou Sesel. Sa  spektak sa lannen ti ganny met ansanm par Seselwaz Valerie Jumeau anba gidans Konsey Nasyonal Lazenes e Komite Lorganizasyon Nasyonal.

Apre sa ti osi annan spektak kiltirel par en varye artis Seselwa enkli bann ganyan konpetisyon sanson pour Lazournen Nasyonal ki ti osi performen. Antoinette Dodin e Judith Hoareau ti sant zot sanson avek tit ‘Meyer plas anba lesyel’ ki ti fer zot ganny premye pri. Travis Julienne avek sanson ‘Avan Tou’ e  Simon Amade avek sanson ‘Mon Sesel’ ti osi enterpret zot sanson.

Ou ti osi kapab war santer parey Janty De Letourdie ki ti sant sanson ‘Kimol in vin ponp labou’ konpoze par Paquerette Labrosse, e John Wirtz ti sant son sanson ‘Lendepandans’, Ketty Melanie avek sanson ‘Mon swe’ parmi lezot ankor.

Sa sware vibran ti osi ganny animen pour premye fwa  par en demonstrasyon bann diferan zes lo moter par polisye militer Endyen ki ti atir bokou  spektater. Zot demonstrasyon ti enkli pas dan miray blok, dan vit e dan serk dife. Sa group lapolis militer endyen vreman talante e zot pe tenir de rikord mondyal pour anmenm met pli bokou dimoun lo en moter.

Nou seri portre tire par Patrick Joubert ek Louis Toussaint i donn nou en lendikasyon ki mannyer lanbyans ti été le Stad Linite sa swar.

Ralista Hortere