Follow us on:

Facebook Twitter LinkedIn YouTube

Archive -National Assembly

Dezyenm faz semen Belle Vue lo La Digue pe al konmanse |27 July 2015

Departman Transpor Lo Later (SLTA) pe al depans preski 2 milyon roupi pour dezyenm faz semen Belle Vue lo La Digue anmenmtan ki i kontinyen avek son bann lezot proze reparasyon e osi nouvo semen anba proze kapital.

Minis responsab pour transpor Msye Joel Morgan ti donn sa bann lenformasyon letan i ti pe reponn kestyon bann manm dan Lasanble Nasyonal Mardi pase.

Pandan sa sesyon demann kestyon Minis Morgan ti osi profite pour donn bann manm leksplikasyon lo fason ki road tax i ganny servi. 

Manm elekte pour Mont Buxton Sheryl Vangadasamy ti’n demann Minis Morgan si SLTA i annan en plan sistematik  pour mentenir e resirfas bann semen.

Manm elekte pour Anse Boileau Bernard Arnephy lo son kote ti’n demann Minis Morgan leksplikasyon ek detay lo okenn progranm renovasyon mazer ki son minister i annan anplas pour amelyor kondisyon serten semen prensipal ki nesesit en nouvo sirfas.

Minis Morgan ti eksplike ki SLTA i annan en progranm travay sistematik pour tou bann semen primer ek segonder dan pei e sa i enkli resirfas sa bann semen kot in andomaze, resirfas bann semen beton avek siman e repar bann trou, rearanz bann semen kot bann diferan lakonpannyen i andomaze ler zot fouye pour travay lo zot bann kab oubyen tiyo anba semen. Sa bann travay i ganny fer apre ki zofisye SLTA in fer bann vizit pour evalye leta sa bann semen e osi an prenan kont kalite tiyo ou kab ki pas anba la, volim trafik ki pase, kalite travay ki devret ganny fer e osi vwar si bann lakonpannyen servis litilite parey PUC zot annan plan repare, ranplase oubyen sanz landrwa zot bann kab ek tiyo alavenir.

“I pa pou vo lapenn resirfas serten semen kot i annan bann vye tiyo delo ki tanzantan pe kase e fer ki SLTA i bezwen toultan pe rearanz sa bann menm semen,” Minis Morgan ti eksplike.

I ti dir ki dan ka kot PUC napa plan pour sanz sa bann vye tiyo pour en peryod letan parey de a trwa-z-an, e depandan lo leta sa bann semen, i posib ki SLTA i met en sirfas koltar mens ki kapab ganny overlay pli tar avek en proper resurfacing apre ki PUC i fini ranplas tou bann vye tiyo.

Pour zis sa lannen SLTA in travay lo bann proze swivan: semen Bahai Anse Etoile, semen Belonie, semen Castor, serten parti semen Greenwich ek semen Mont Buxton, Lari Hangard, lari Harrison, Lari Labourdonnais, Lari Laloz, Upper Ma Constance, Lari Malakoff, semen Providence ki al kot Micro enterprise…parmi plizyer lezot ankor. Dapre son progranm pour sa lannen, SLTA pou kontinyen avek son travay remet sirfas lo plizyer lezot morso semen e sa i enkli bann semen lo Praslin ek La Digue osi.

Minis Morgan ti osi enform Lasanble ki lo La Digue SLTA pe al konmans dezyenm faz proze kapital pour fer reparasyon lo semen Belle Vue e sa i ekspekte kout anviron 1.8 milyon roupi.

“Pour bann lezot semen beton lo La Digue SLTA pe kontinyen avek bann travay reparasyon kot i neseser. Minis Morgan ti fer resorti ki tou sa bann travay reparasyon pe ganny fer anmenmtan avek lezot proze semen anba proze kapital parey lo Ile Perseverance, Ile Du Port ek zòn endistriyel Providence.

Lo size road tax Minis Morgan ti dir sa i taks ki tou dimoun ki annan en transpor ki roule lo semen zot bezwen peye e i al dan fon gouvernman ki apre ganny distribye atraver bidze ki SLTA osi i gannyen toulezan pour bann proze reparasyon semen e osi bann proze semen ki tonm anba proze kapital.

Minis Morgan i dir ki pour sa lannen SLTA in ganny en sonm 30 milyon pour reparasyon semen e 58 milyon pour bann pli gro proze kapital.

Minis Morgan ti eksplike ki 55 a 58% dan sa de alokasyon i sorti dan kontribisyon ki manm piblik i fer atraver road tax e gouvernman pe osi met larzan dan proze semen me sa i touzour pa sifizan e nou bezwen plis larzan pour kontinyen gard nou bann semen dan en bon leta.

“Nou’n demann governman ankor en sonm  11.2 a 12 milyon roupi pour kontinyen bann travay kot i neseser pour larestan sa lannen akoz nou bezwen ankor plis resours pour met nou bann semen lo sa nivo ki nou piblik i demande,” Minis Morgan ti fer resorti.

 

 

 

 

» Back to Archive