Minister pou entrodwir sistenm HIS pour ede adres problenm mank latizann |29 July 2015

Minis pour Lasante Mitcy Larue in admet ki son minister i parfwa fer fas avek problenm mank latizann dan son stor medikal kot Lopital Sesel.

Sa i leka menm si in ensiste ki i pa zanmen annan en gran mank latizann dan pei e ki Minister Lasante i toultan asire ki i annan en stok kat mwan.

In osi azoute ki dan ka mank latizann, dokter i esey donn pasyan latizann alternativ, ou byen zot preskri latizann pour en letan pli kourt.

Sepandan, kan pasyan in abitye avek en kalite latizann, i difisil pour zot sanze, menm si sa  latizann i disponib dan farmasi prive.

Minis Larue ti pe koz dan Lasanble Nasyonal yer bomaten ler i ti pe reponn en kestyon Sef Lopozisyon dan Lasanble, Onorab David Pierre.

En lot rezon ki koz mank latizann, Minis Larue in dir, se labi kot kan en pasyan i al kot dokter zis pour li ganny konze e i pa servi sa latizann ki in gannyen.

Dan bokou ka, in azoute, en pasyan i al dan en lot klinik si i pa’n ganny konze dan sa enn premye.

Konman en fason pour anpes sa labi e ede adres sa problenm mank latizann, Minis pour Lasante in anons lenstalasyon sistenm HIS (Hospital Information System), probableman apartir lannen prosenn.

In azoute ki travay de baz in deza ganny fer avek Departman Teknolozi Lenformasyon e Kominikasyon (DICT) lo lenstalasyon sa sistenm ki pe finanse par gouvernman Lenn.

HIS i en sistenm lenformasyon lo konpiter, ki fokaliz prensipalman lo bann bezwen lopital. I kapab zer tou laspe dan loperasyon en sistenm lasante tel ki medikal, administratif, finansyel, legal ek servis.

Menm si zefor pe ganny fer pour adres problenm mank latizann, Minis Larue in lans en lapel avek piblik pour pa gaspiy latizann, sirtou bann ki al klinik zis pour ganny konze.

In osi donn lendikasyon ki, avek konsey Lorganizasyon Mondyal Lasante (WHO) Minister Lasante pou redwir preskripsyon serten antibiotik ki kapab annan en lefe advers lo lasante. In konklir ki menm si servis lasante pou reste gratwit, son minister pou antreprann en demars pour enform sak pasyan lo kou son konsiltasyon ek latizann.

Letan i ti dan Lasanble Nasyonal yer, Minis Lasante ti osi koz lo problenm sekirite dan bann klinik kot travayer lasante in parfwa ganny agrese.  

I ti dir ki pour adres sa sitiasyon, gouvernman i annan lentansyon met gard sekitrite dan tou bann sant lasante dan pei.

Pour bann fanmir ki parfwa pa konpran ou pa respekte bann regilasyon dan lopital, sirtou kan zot pa satisfe avek tretman ki zot pros in gannyen, minis in donn lasirans ki bann ners in ganny lantrennman pour kapab kontrol zot. Me in admet ki zot bezwen resevwar plis formasyon pour fer fas avek sa bann sitiasyon, enkli donn sipor sikolozik sa bann fanmir.

Minis Larue in osi eksplik protokol ki anplas pour gid prosedir kan en dimoun i mor, sirtou sibit, kot son lakour. In konfirmen ki si paramedik i konstate ki sa dimoun in mor, i pa kapab fer nanryen anplis. Se lapolis e non pa lanbilans ki anmenn sa lekor kot klinik, kot en dokter i deklar li mor. Menm si serten siny i permet paramedik konnen ki sa dimoun in mor, dokter i osi parfwa deplase. Me minis in dakor avek bann manm lasanble pour revwar sa protokol, pour ki dan tou ka dokter i deplase e al sertifye sa dimoun mor kot li.

Me dan ka kot en lekor i ganny dekouver en pe letan apre lanmor ou dan en leta dekonpozisyon, lapolis pou kontinyen anmenn sa lekor direkteman lakaz mor.