Konvansyon Parti Nasyonal Seselwa (SNP) |04 August 2015

‘SNP i annan konfyans ki i pou ranport prosen eleksyon’

Ti en lanbyans ver Dimans apremidi dan Sant konferans Enternasyonal (ICCS) kot bann manm komite egzekitif Parti Nasyonal Seselwa (SNP), reprezantan bann distrik ek lezot partisan ti’n regroupe pour konvansyon anyel sa parti lopozisyon.

Sa konvansyon ti deroul anba tenm “Ler in Arive” oubyen “The Time is NOW” an Angle.

Lider parti Wavel Ramkalawan ti dir ki « i annan en divan sanzman ki pe soufle e ki nou lavey en moman istorik dan listwar nou pei ». Avek sa, i ti eksprim konfidans ki SNP pou ranport prosen eleksyon.

« Mon kwar ki se SNP ki pou donn Sesel son prosen prezidan. […] I pa en kestyon si, i en kestyon pour nou konman en pep pran nou desten dan nou lanmen. Apre 38-an, i annan en soley ki pe leve e en labouzi ki pe tennyen. Nou pou tenny sa labouzi rouz e ranplas li par enn ver,» Msye Ramkalawan ti dir.

Pour sa i ti demann Seselwa pour aret per, me vin bann aktivis e fer doub zefor dan bann mwan ki pe vini, pour kapab fer sa arive « akoz sa travay transformasyon i dan lanmen nou tou ».

« Nou devan laport e nou pe al antre. Tenir ferm, pa les tonbe e nou a vir sa gro ros ki zis en pti kal pe tenir li,» Msye Ramkalawan ti dir, avan ki i ti demann Seselwa pour donn son lekor en kado zour eleksyon.

Dapre Msye Ramkalawan, lefe ki son parti ti boykot dernyen eleksyon, sa in fer li vin pli for akoz Seselwa in mank son prezans dan Lasanble Nasyonal. I dir ki aprezan, Seselwa i konn ladiferans ant gouvernman ek lopozisyon. Zidisyer in osi reveye e reklanm son lendepandans dan bokou lenstans in azoute. In swete ki zidisyer i kontinyen al dan menm direksyon pour asir drwa tou Seselwa.

I ti azoute ki enn bann target prensipal son gouvernman si i vin opouvwar, se lalit kont koripsyon atraver en komisyon endepandan ki pou fer lanket dan bann ka koripsyon.

« Pou napa pardon pour bann ki’n vol larzan gouvernman. Nou pou fer sir ki sa bann larzan i retourn dan kof leta, » i ti dir.

Fas a rimer ki dir ki i pou demisyonnen konman lider SNP, Msye Ramkalawan ti plito promet pour debout pli for pour anmenn sanzman.

In anonse ki son parti pou byento fer sorti son manifesto pour prosen eleksyon. Progranm dan manifesto pou konpri donn bann zenn en meyer ledikasyon e retir zot dan drog ek prostitisyon, donn travayer meyer kondisyon, redwir kriminalite e promot respe ek lepanouisman dan tou Seselwa e ofer lepep meyer lasante e sekirite, ensi ki en meyer lekonomi pour pei.

Sekreter zeneral parti, Nicholas Prea, ti lo son kote dir ki SNP i reste angaze dan lavi politik pei.

I ti azoute ki sa langazman in marke par bann miting piblik kontinyel, en lamars atraver Victoria kont taks ki i kwar i tro o, reisit dan zot demars legal pour anpese ki POA (Public Order Act) i vin an viger e sirtou kontribisyon pour ki Lazournen Lafet Nasyonal Sesel i revin le 29 Zen.

I ti dir ki atraver son bann aksyon ki viz ver plis demokrasi dan nou pei, SNP in kontribye dan bokou sanzman ki’n arive.

Sa i ti azoute, i malgre ki sa parti pa ganny okenn sibvansyon avek gouvernman, apre ki i pa ti partisip dan dernyen eleksyon.

Lo azanda SNP si sa parti i vin opouvwar, Msye Prea ti souliny lalit kont koripsyon ek diskriminasyon. I ti ensiste lo promes pour ki pansyon pour bann vyeyar i vin 5000 Roupi par an.

Serten lezot manm komite egzekitif ti osi pran laparol pandan konvansyon. Reprezantan bann madanm, Desheila Bastienne, ti lans lapel avek Seselwa, sirtou bann madanm ek zenn fiy, pour aret per me plito zwe zot rol politik e anmenn en sanzman dan pei.

Lo non bann zenn, Christine Amade ti demann plis laliberte e sans egal dan sosyete, san kontrol ek lenflians lotorite e pour ki bann zenn pa les zot tonm dan fleo drog.

I ti deplor sitiasyon « de pwa de mezir kot sa ki trafik kanabis i kondann lavi prizon e sa ki trafik eroin i ganny large ».

I ti demann gouvernman pour aret enterfer dan travay NDEA ek lapolis.

Gervais Henrie ti lo son kote donn lasirans ki SNP i kwar dan donn lepep lespas e mwayen pour epanouir atraver reprezantasyon sosyal, sivik e politik.

I ti eksprim swe ki konman pli zoli pei dan lemonn, Sesel i osi vin pli zoli demokrasi.

Konvansyon ti osi fer serten propozisyon atraver son bann rezolisyon: Par egzanp ki lapolis i vin pli profesyonnel, ki gouvernman i met plis larzan dan lasante e fasilite pour bann zenn, ki bann envestiser etranze i respekte lalwa pei, en sistenm pansyon pli zis pour tou travayer, ankouraz dimoun lo welfer pour fer en pti biznes, nominasyon en sef ziz Seselwa e tir portre prezidan dan bann batiman piblik e ranplas li par senbol nasyonal Sesel.

An se ki konsern posibilite en lalyans avek lezot parti lopozisyon pour prosen eleksyon, konvansyon ti demann parti pour etidye byen avan pran okenn desizyon.

Msye Ramkalawan, in komante ki lefe ki serten dimoun ki ti dan gouvernman in prezan form en parti lopozisyon, sa i montre ki kritik ki SNP in toultan fer kont gouvernman ti vre.

Pandan konvansyon, Msye Ramkalawan ti osi prezant en tokenn lapresiasyon a bann manm ki’n fer en kontribisyon remarkab dan parti. Pli gran rekognisyon ti al pou Msye Jean Dingwall, e osi de defen, Msye Archange Michel e Madanm Ebrona Brioche.