25 nouvo solda i pret serman |17 August 2015
Lafors Defans Pep Sesel (SPDF) in akeir 25 nouvo manm.
Sa i apre ki zot in swiv en formasyon de baz ki’n dir pandan en peryod kat mwan. Apard formasyon militer, sa bann solda in osi ganny antrennen pour tenny dife e donn premye swen.
Sa 25 solda ti pret serman devan sef SPDF, Brigadye Leopold Payet, ki ti formelman resevwar zot dan lafors. Sa ti dan en seremoni kot Lakademi Ladefans lo Lil di Swet Vandredi apremidi dan prezans lezot o zofisye SPDF ek fanmir bann nouvo solda.
Apre ki sa 25 nouvo prive ti’n resevwar benediksyon Lomonye SPDF Dyak Louis Agathine, Brigadye Payet ki ti adres zot, ti met lanfaz lo restriktirasyon SPDF, avek en nouvo vizyon pour moderniz lafors defans.
I ti fer rapel ki fas a diferan fleo mondyal, sekirite ek stabilite i de eleman esansyel pour asir devlopman ekonomik nou pei.
Dan kad sa restriktirasyon, Brigadye Payet ti dir ki sa bann solda in benefisye avek en nouvo progranm lantrennman.
I ti salye zot pour zot o nivo konportman ek kouraz, e remersye zot pour zot sakrifis ki montre zot konviksyon pour defann lentegrite nasyonal.
«Zot dezorme form parti solisyon Nasyonal,» i ti dir zot, an fezan rapel ki zot lwayote i ekstrememan enportan.
I ti averti zot lo defi ki pe esper zot dan sosyete, me ki zot a kapab sirmonte apre lantrennman ki zot in resevwar.
«Zot lantrennman i reste en konpa pour diriz zot ver zot lobzektif,» i ti dir, pour permet zot met konpetans ki zot in gannyen an aplikasyon e reste alert e aktif dan sa ki zot fer, sirtou pour ed lezot dimoun dan lasosyete.
Sef SPDF ti demann bann nouvo solda pour reste disiplinen, serye e senser.
«Pa les zot ganny enflianse par bann eleman anti sosyal ki pe afekte nou sosyete, me plito kontribye pour elimin sa bann fleo,» i ti demann zot.
I ti ensiste ki sa bann solda pe sermante a en peryod kot pei pe devlop sitan vit e kot zot konnesans teknik pou neseser pour zot kapab partisip dan sa devlopman.
I ti demann zot pour kontinyen agrandi zot konnesans, pandan ki Lafors Defans e gouvernman i fer tou pour fasilit zot lentegrasyon.
Pandan seremoni, bann solda ki’n fer pli byen pandan formasyon ti osi resevwar en pri. Se Prive Jerome Philoe ki ti resevwar pri pour meyer solda e osi meyer dan lapratik. Pri pou meyer lo nivo akademik ti al pour Allen Malcouzane.
La ki zot in sermante, sa bann solda pou aprezan entegre dan bann diferan seksyon SPDF parey Gard Lakot, Larme de Ler ek Lenfantri.
Pandan seremoni Vandredi, SPDF ti osi remersye bann solda ki ti form parti delegasyon Sesel kot dernyen Zwe de Zil ki ti fer Larenyon. Sa ti Prive Melina Crispin ki en zwer dan lekip volibol madanm e ki ti ganny meday lor. Segon Lyetnan Ivan Moïse ti lo son kote ganny meday larzan dan atletik, alor ki Prive Annalita Cadeau ti form par lekip foutbol madanm.