Youth Buzz i ouver ofisyelman |27 August 2015
Bazar Youth Buzz dan kad Festival Lazenes ki pe ganny selebre anba tenm ‘Kalite Lavi ek Byennet Lazenes Seselwa’ ti ouver ofisyelman yer dan landrwa kot i abitye fer Regatta, Beau Vallon.
Seremoni louvertir ti asiste par sekreter prensipal dan biro vis-prezidan Jeanne Siméon, sekreter prensipal pour lazenes Alain Volcère, manm Lasanble Nasyonal pour distrik Beau Vallon Mirena Souris, sef egzekitif Konsey Nasyonal pour Lazenes (SNYC) Alvin Laurence, bann zenn ek lezot envite distenge.
Ti annan en defile lanmod sorti dan koleksyon labiyman prepare par en zenn stilis Telma Labiche swivi par performans en sanson par bann zenn vreman talante.
Pandan louvertir Jean-Paul Toulon, ki enn parmi bann zenn antreprener ki’n angaz zot dan sa progranm ki ti lanse an Mars 2013, ti fer en temwayaz pour partaz son parkour avek bann ki ti prezan e osi ankouraz lezot zenn pour « leve e debrouye pour nou fanmiy, nou pei e nou lavenir ».
Avek lespri pour ankouraz bann zenn pour kree zot prop biznes, SNYC ti lans konpetisyon ‘Youth Buzz’ boner sa lannen ki konpri de kategori. Premye kategori konpetisyon ti pour bann zenn ki annan nide biznes me ki pa ankor konmanse e dezyenm kategori ti pour bann zenn ki dan biznes pour pa plis ki 2-an e ki pe anploy pa plis ki 5 dimoun.
Dan premye kategori sete Jimmy Port Louis ki ti venker avek son proze long line fishing ki apel Ocean Saviour Company. Dezyenm plas ti al pour Petrina Banane avek son proze Sugar Rush bakery and catering swivi par Michelle Legras ki ti termin twrazyenm avek proze Heaven’s beauty spa.
Jean-Paul Labonte ek Jean-Paul Toulon avek zot proze Out of the box ti ganny premye pri dan dezyenm kategori. Sa de gannyan ti swiv dan dezyenm plas par Keneth Dodin avek son proze Paroke design.
Gannyan sa konpetisyon pou pran par dan en konkour rezyonnal ki pou ganny fer Madagascar.
Dan son diskour, tyermenn Lasosiasyon pour bann Zenn Antreprener dan Sesel (AYES) Iouana Pillay ti dir ki sa konpetisyon i en platform pour bann zenn antreprener ki anvi demontre e promot zot biznes.
« I en loportinite pour bann zenn antreprener pour devlop bann nouvo konsep biznes e nou lasosiasyon i fer sir ki sa bann loportinite i egziste pour zot, » i ti dir.
Manmzel Pillay ti demande ki plis i ganny fer vi ki AYES in pare pour zwenn avek SNYC ek lezot partener pour fer Youth Buzz pli vibran e anmenn li lo en lot nivo ki i ava annan en pli gran lenpakt lo pei.
Lo son kote Msye Laurence ti remyerse tou son bann partener parey Labank Komersyal Sesel, Labank Devlopman Sesel, labank Barclays, ek AYES parmi lezot ki’n ede fer sa progranm vin en sikse.
I ti osi fer resorti ki SNYC in pare pour les bann zenn antreprener anmenn sa progranm lo en lot nivo.
Lafwar Youth Buzz ti ale ziska 6er diswar ansanm avek ‘Bazar Labrin’ me i pou deroul kot Freedom Square aparti demen ziska Dimans.
Bann aktivite Festival Lazenes i kontinyen ozordi avek en latelye lo lanplwa pour lazenes. Sa pou deroul dan Sant Konferans Enternasyonal.
