Follow us on:

Facebook Twitter LinkedIn YouTube

Archive -Entertainment

José Charles i demann ‘en kestyon frazil’ |29 August 2015

 

 

 

Apre 9-an ki i pa ti’n prodwir en albonm, santer e mizisyen popiler José Charles in retourn avek ‘En kestyon frazil’. En koleksyon 13 sanson ki regroup son bann ritm favori parey balad, sega e sega-moutya.

Son dernyen albonm ti annefe ‘Se nou’, ki ti paret an 2005 e lo lekel nou a rapel sa sanson, ‘Ekoute zanfan’.

José i dir nou ki in pran tou sa letan akoz an se moman i annan en kantite santer ki pe ofer piblik en varyete prodwi, e ki si i pa pran son letan, son travay pou perdi lanpler.

« Ou bezwen asize, ekoute e analize ki pe pase. Ler ou dormi apre ler ou leve tou dimoun i anvi ekout ou. Si toultan ou pe fer albonm, a en moman piblik pa pou enterese. Letan ou’n esper lontan, zot anvi konnen ki ou pe vin avek, » José i dir.

Apre tou sa letan, petet nou ti osi anvi reantann serten son bann sanson pli popiler parey ‘Angèle’, ‘Lekol se ledikasyon’ ou ankor ‘Dir mwan cheri’. Me José in prefere met en lot son bann vye sanson lo sa nouvo CD : sa i ‘Profet lantikite’ ki ti gannyan konpetisyon sanson Festival Kreol an 2010.

José i eksplike akoz:

« Akoz i aprezan ki sa sanson i ganny sans aparet lo en albonm. Zanmen in aparet lo en albonm oparavan,” i dir.

I paret ki José Charles - ki dekri son lekor konman en defanser e promoter lalang e kiltir Kreol - ti anvi met sa sanson ki’n fer li ranport pli gran sikse lo lasenn kreolofonn. I ti osi ensiste ki sa lartik ki ou pe lir lo son dernyen travay i an Kreol, akoz parey i dir limenm “tou sanson lo sa albonm i an Kreol eksepte ‘The lost paradise’ ki an Angle”.

Me menm si sa sanson i an Angle, « osi pour rezon touristik » parey José i azoute, i repran enn son bann tenm favori : Labote Sesel e proteksyon son lanvironnman. ‘Annou protez li’, ‘Zil mon zanset’ e ‘Isi anba dan Losean Endyen’ i bann lezot sanson lo sa albonm ki reponn a sa tenm.

Parey i dan son tradisyon, si ti napa lanmour, sirman albonm Jose Charles pa ti pou konplet. Lanmour i annefe retournen dan laform ‘En kestyon frazil’, me  osi avek ‘Ankor enn fwa’, ‘Lanmour fou’ e ‘Lespri tourmante’. Me parey tit san enn sanson i dir, sa voyaz José in anmenn en  lanmour nostalzik e tris. Parfwa, apre ki ‘Tou ti nice, tou ti dou, tou ti gou’, i menm plito annan en mank lanmour ki malerezman kre plas pour laenn.

José i eksplik sa sanzman:

« Akoz depi ler mon’n konmans sante, byen rar mon’n war en lanmour pozitif. Dan san relasyon, spesyalman dan lavi konmela, zis enn ou de ki annan en happy ending ».

Menm si sa in zeneralman baze lo son lobzervasyon ler i dir i regard otour li, sa artis poetik e santimantal pa kasyet ki se osi son prop leksperyans. Sa pa kanmenm anpes li reste en anmoure pozitif, parey i montre dan ‘Lannwit divin’. Lanmour i menm prezan dan gospel atraver son sanson ‘Lafwa’, kot sa santer krwayan i zwenn konpoziter Didier Confait pour dir « pour lafwa fleri toulezour, fodre nou plant li avek lanmour ».

En dernyen sanson i vin konplet sa zoli seleksyon ki vreman en plezir pour ekoute, e ki son lanbalaz – ekselan travay grafis Nigel Henriette -- i form en zoli livre ki fer en bon souvenir oubyen kado: Dan ‘Top up’, José i repran en lekspresyon alamod dan en filozofi e leson ki dir nou pa kritik nou prosen, me plito konpran e ed li. I osi fer rapel ki bokou nou pa obzerv sa ki nou prese!
Dernyen kestyon ki vin otomatik, se kan ki José Charles pou prodwir en prosen albonm ? Eski son bann ‘fans’ pou esper ankor 9-an ? José i dir ki i anvi prodwir en lot albonm lannen prosenn, me ki i ezite akoz lavant CD in desann.

“Mon pe gete akoz lavant in desann. Sa i akoz i annan tro bokou piratri. Letan nou pe esey lit kont piratri, teknolozi pe ed pirat. Par egzanp, i annan loto konmela ki zwe zis USB ».
Sa artis Seselwa i dir ki nou’n ariv a en pwen tris e regretan kot en dimoun i dir li fran ki i pa pou aste son albonm, me ki i a ganny en kopi avek en lot dimoun. I panse ki en mekanizm i devret ganny aplike pour anpes kopi en CD orizinal.

José ki dir ki piratri pe detri lendistri lanmizik Sesel, i osi fer rapel ki i’n osi viktim piratri dan en lot fason. Sa i apre ki en santer Morisyen in repran ‘Dir mwan cheri’ san son permisyon. I kanmenm dir nou ki kontrerman a bokou lezot artis Seselwa ki ankor pe rod konpansasyon pour zot sanson ki etranze in vole, i santi li sanse apre ki in met zafer an kour e finalman sa artis in pey li.

« Si sa i ariv ankor mon pa pou larg zot. Si zot pran mon sanson zot pou pey mwan, » en José Charles determinen i dir.

José Charles i kanmenm satisfe ki in kapab prodwir son albonm limenm lokalman, menm si i dir in kout li pli ser ki si i ti pou fer aletranze. I oule remersye tou dimoun ki’n ed li realiz sa travay. Sa i son madanm Thérèse ki’n kontribye pour ekrir serten sanson, Sly ki’n pret son lavwa, Marshal Knowles, Peter ek Nabby Jules ki’n rikorde e mikse, ensi ki son bann mizisyen : Danny Jules, Alain Bacco, Johnny Robert, Tony Julie e Mervin Nibourette.

‘En kestyon frazil’ I an vant Kot Do, kot Ray’s Music Room e dan serten laboutik souvenir a en pri 150 roupi. Si ou aste avek José, i kout selman 125 roupi.

Antretan ki ou esper en lot CD, si ou anvi vwar Jose Charles ‘live’, ou kapab al vwar li pe zwe tou le Vandredi swar kot restoran ‘Les Dauphins Heureux’ Anse Royale, avek son zanmi mizisyen Alain Melanie.

Ou kapab osi kontakte li lo limero 2510891 ou par imel lo ladres swivan:
 charlesjose63@gmail.com

Michel Savy

 

 

 

» Back to Archive