Konkour Miss Creole des Iles International pou lanse pour Festival Kreol |29 August 2015

Premye konkour Miss Creole Des Iles International pou lanse le 10 Oktob pandan Festival Kreol.

Telly’s Modelling Agency, ki responsab pour organiz sa levennman, i dir ki sa enn edisyon i en platform pour ofisyelman lans sa konpetisyon avek bann fiy aze ant 18 a 30-an, selibater e san zanfan sorti dan en pei kreolofonn e ki’n reste dan sa pei pour sa dernyen 5-an.

Pour lans sa konkour, Telly’s Modelling Agency in depi konmansman sa mwan ouver kandidatir pour bann fiy Seselwa ki annan sa bann kriter ki sa konpetisyon pe demande.
 
Ziska prezan i annan anviron senk fiy ki’n soumet zot laplikasyon.

Telly’s Modelling Agency i dir ki son target se pour annan 12 fiy dan final.
Telly’s Modelling Agency i eksplike ki bi sa konkour Miss Creole Des Iles International se pour anmenn tou ban fiy Kreol ansanm pour ankouraz lanmitye ant bann zil, fer ki sa bann fiy i annan plis konfyans dan zot menm, donn plis valer zot idantite Kreol, e ekip zot avek bann kalite pour zot sirmont bann defi ki annan dan lavi toulezour.

Apre ki lansman Miss Creole Des Iles International in fer le 10 Oktob, sak pei ou zil kreolofonn ki soumet zot kandidatir pour sa konkour avek sekretaryat Miss Creole Des Iles International ki pou baze isi, pou organiz zot prop konkour Miss Creole. Sa fiy ki sorti venker dan sa konkour pou reprezant zot pei ou zil dan konkour Miss Creole Des Iles International. Lorganizasyon konkour Miss Creole Des Iles International pou ganny donnen avek diferan pei ki annan enn zot reprezantan dan sa konpetisyon.

Terry Carolla, responsab konkour Miss Creole Des Iles International, i dir ki Telly’s Modelling Agency i annan bi fer sa konkour enn ki ganny rekonnet lo nivo enternasyonal.

“Nou bi se pour fer sir ki konkour Miss Creole Des Iles International i pran son plas lo lasenn enternasyonal e atir gran lapres enternasyonal.  Nou oule ki sa konkour i vin en lot levennman ki promot kiltir ek tourism dan Sesel e pli enportan ki i vin en platform pour devlop sa bann fiy e donn zot bann bon kalite pour zot annan plis konfyans dan zot menm,” Msye Carolla in dir.
Gannyan Miss Creole Des Iles International pou travay avek sekretaryat Miss Creole Des Iles International pour met an plas bann progranm edikasyonnel dan zot pei respektiv, vin avek bann nide inovativ pour valoriz zot kiltir Kreol ki swa ladans ou lanmizik e vin en anbasader Kreol pour bann zenn zenerasyon.

Miss Creole Des Iles International pou en “role model” pour tou bann fiy Kreol.

Okenn fiy ki ti a anvi pran par dan konkour Miss Creole Des Iles International zot annan ziska le 30 Out pour anmenn zot laplikasyon kot Telly’s Modelling Agency.