Trwa maren Seselwa i ganny ranmase sen e sof |05 September 2015
Sa trwa maren ki bato Franse Franche Terre ti’n ranmase pe drive lo lanmer ti ariv Mahé yer bomaten e debarke lo nouvo por lapes Ile Du Port kot zot ti toudswit apre ganny transporte lopital pour bann tes medikal.
Reprezantan plizyer lotorite dan pei parey lazans ki lit kont trafik drog (NDEA), lapolis, Ladministrasyon Sekirite Maritim Sesel (SMSA), ti lo por pour kestyonn sa trwa zonm.
Abor sa bato ti osi annan 34 maren ek 5 zofisye militer Franse.
Jean-Pierre Pool, Robin Samson ek Sandy Vidot pa ti koz avek medya.
Dapre direkter zeneral SMSA, Kaptenn Joachim Valmont, sa trwa zonm ti dan problenm depi le 9 Out
.
«Dapre propriyeter sa bato ki osi skipper zot ti’n kit Praslin le 8 Out abor son bato Rocker pour al fer en trip Amirantes, en treasure hunt lo bann sit kot zot konnen bann bato in koule pour zot al plonze e ranmas bann keksoz valer e dapre zot zistwar ti sa zot lentansyon,» Msye Valmont ti dir.
I ti fer resorti ki dapre zot zistwar ti ver 9er diswar le 9 Out ki zis en sel kou devan bato ti ouver e sa skipper limenm pa ti tro kapab eksplike kwa ki ti’n arive. Me bato ti konmans pran delo e dan lespas 5 minit bato ti konmans koule.
«Zot ti nobou fer zot mannev akoz zot ti annan zodyak avek life raft,» Kaptenn Valmont ti azoute an dizan ki dapre sa bann zonm zot ti’n kapab sirviv tou sa letan akoz zot ti manz pwason ek zwazo kri e bwar delo lapli ki zot ti ranmase dan zodyak ki zot ti ladan ziska ki zot ti ganny ranmase le 25 Out.
Kaptenn Valmont i dir lotorite ti pe kestyonn sa trwa zonm prensipalman akoz personn pa ti konnen si zot ti’n perdi.
«Tou bato i merit averti lotorite por letan zot deplase avek tan kantite dimoun abor e kan zot sipoze retournen me dan sa ka propriyeter sa bato in fer konpran ki li i pa’n averti lotorite me zis son fanmir ki ti konnen e ki zot ti’n sipoze lo lanmer pour zis set a wit zour me ziska ozordi personn son fanmir pa’n fer konnen okenn lotorite konmkwa zot manke e pa ankor retournen,» Msye Vamont ti fer resorti.
Antretan lotorite i kontiny son lanket dan sa ka.
