38 nouvo polisye i pret serman |25 September 2015

En group 38 nouvo polisye ti sermante devan komisyoner lapolis Msye Ernest Quatre yer apremidi, apre ki zot in swiv en formasyon enn an edmi. Sa ti pandan en seremoni parad ki ti deroul kot Lakademi Lapolis Pointe larue.

Envite doner kot sa seremoni pret serman ti Prezidan Larepiblik Msye James Michel. Osi prezan ti Minis pour Zafer Entern Charles Bastienne, konseye militer dan biro Prezidan Kolonnel Clifford Roseline, Sefdeta Mazor Lafors Defans Pep Sesel (SPDF) Lyetnan Kolonel Michael Rosette, lezot ozofisye lapolis e larme, paran bann nouvo polisye e lezot envite.

Parad ki ti animen par Lakoral Nasyonal ti dirize par lenspekter Peter Dacambra. I ti konpri partisipasyon lapolis regilye e ‘Response Unit’ – de brans lapolis ki’n dezorme akey sa bann nouvo gard.

Prezidan Michel ti ganny loner pour prezant pri – en  laptop e lakoup ki limemn i’n ofer – a Shane Tambara ki ti meyer etidyan pandan formasyon. Meyer dan ‘Response Unit’ ti Alexander Cherry.  Pri pour meyer lo nivo akademik ti al pour Bertrand Valmont e Alina Doudée, alor ki Channel Augustin e Jude Dubignon ti meyer lo nivo pratik. Gina Santache ti polisye ki ti’n montre plis progre pandan formasyon e Peggy Rachel ti’n montre pli bon disiplin.

Pandan seremoni yer, trwa ozofisye lapolis ti osi ganny promosyon. Sa ti swiv 40 lezot ant ran kaporal a lenspekter ki ti’n ganny promote yer bomaten. Romano Songor in sorti Asistan Sirentandan pour vin Sefsirentandan, Lenspekter James Tirant in vin Asistan Sirentandan e Lenspekter Peter Dacambra ti osi fini parad koman Asistan Sirentandan.

En group polisye ki’n swiv formasyon dan sirveyans video oubyen CCTV ti osi resevwar zot sertifika.

Komisyoner Quatre ti dir avek bann nouvo polisye ki sa moman i enn dan bann moman pli memorab dan zot lavi. I ti azoute ki i osi reprezant en gran responsabilite ki sakrifye zot lavi sivilyen, akoz tou sa ki zot pou fer aprezan pou annan en lenpakt lo zot karyer profesyonnel. I ti fer zot rapel ki zot in ganny lantrennman pour rann servis lepep Seselwa, latas ki i ti dir i priorite lapolis.

«Bokou in envestir dan zot. I  aprezan zot devwar pour rann lasosyete sa ki in donn zot,», Msye Quatre ti dir.

I ti soulinyen ki zot in zwenn lapolis a en moman eksitan, kot sa lafors pe ofer nouvo loportinite, avek nouvo formasyon, servis e fasilite. Sa i enkli devlopman nouvo teknolozi e lenvestisman dan lenfrastriktir, parey konstriksyon nouvo kordgard Mont Fleuri, Anse Aux Pins e Grand Anse Praslin.

Son mesaz pour sa lokazyon se ki bann polisye i les zot ganny enspire par bann ki’n ganny promosyon, pour ki en zour zot a osi ganny rekonnet pour zot zefor.

Komandan Lakademi Lapolis, Sefsirentandan Francis Songoire, ti lo son kote fer resorti ki i en loner pour lapolis pour resevwar en lot group dan lafors. I ti felisit sa group pour fer en bon swa karyer e pour sikse ki zot in anrezistre dan zot formasyon. I ti demann zot pour met zot liniform avek dignite e akonplir plennman zot misyon.

«Pa les zot ganny tante dan nenport ki sirkonstans. Lapolis pa pou toler zot pour okenn move lentansyon ou faver,» i ti konklir.

Pour enn bann nouvo polisye Stenio Cadeau,  sa moman sermantasyon i mark en pwen enportan dan zot karyer. I ti dir ki zot formasyon pa’n fasil, me ki zot rezilyans in montre ki i pa’n enposib. In azoute ki zot in elimin sak lobstak enn par enn e zot sikse i montre koman bann zenn i kapab reisir ler zot annan zot lobzektif aker. I ti termin par remersye lafors lapolis pour akey zot, zot bann lenstrikter pour form zot e zot fanmir pour zot sipor.

Sefsirentandan Romano Sogor, Asistan Sirentandan ek Asistan Sirentandan James Tirant Peter Dacambra pe ganny dekore avek zot nouvo grad  par komisyoner lapolis Ernest Quatre